तिम्रो र मेरो मायाको फरक (कविता)

तिम्रो र मेरो मायामा
यति फरक छ
तिम्रो माया ढुङ्गा जस्तो छ
अनि
मेरो माया कपास जस्तो
मझेरीमा बसेर कपासबाट
मेरी हजुरामाले
बत्ति कात्दा
जसरी लामो तान्नु हुन्थ्यो
त्यसैगरी मेरो माया
तन्काउन सकिन्छ
म आशा गर्छु
मेरो माया कत्ति लामो हुँदो
हो है
तर
ती बदमासी चार ओटा
औँलामा पाँच फन्को बेरिएर
च्वाट्ट चुटिएपछि म झसक्क
झस्किन्छु
तिम्रो र मेरो मायामा यत्ति
फरक छ
तिम्रो माया चकलेट जस्तो
छ
अनि
मेरो माया चुइगम जस्तो
तिम्रो त्यो चकलेटी मायामा
थोरै गुलियो भए पनि
एकै छिनमा बिलाइ जान्छ
तर मेरो माया
चुइगमको अलिकति गुलियो
भए पनि
धेरै बेरसम्म राखेर
त्यसको फरक फरक स्वाद
लिन सकिन्छ
कहिले म तनक्क तन्केर
यति लामो हुन्छु
कहिले तिमीले नै फुल्याएर
भकुण्डो जस्तो डल्लो पर्छु
र
तिम्रो ओठमा रहेको हुन्छु
अनि
सुक्खा भएर प्याट्ट फुट्छु
र
तिम्रै ओठभरि टासिन्छु
तिम्रो र मेरो मायामा यति
फरक छ
तिम्रो माया सिलिन्डर जस्तो
छ
जो रित्तिने बित्तिकै तुरुन्त
साटिन्छ
तर
मेरो माया त्यही सिलिन्डरमा
जोडिने पायप जस्तो छ
जो कालो भएर पनि उही
रहिरहन्छ
न त फेरिन्छ
न त हेरिन्छ
तिम्रो र मेरो मायामा यत्ति
फरक छ ।

No Result