बिशेष अनलाइन । चलचित्र कर्मी महासंघ प्रदेश १ ले सम्मान तथा शुभकामना आदान प्रदान कार्यक्रम सम्पन्न गरेको छ । बराह नगरपालिकाका प्रमुख निलम खनालको प्रमुख आतिथ्यमा भएको कार्यक्रममा प्रदेश १ मा निर्माण भएर राष्ट्रिय तथा अन्तराष्ट्रिय अवार्ड जित्न सफल चलचित्रलाई सम्मान गरिएको थियो । कार्यक्रममा सुनसरीको बराह नगरपालिकामा रहेको श्रिलंका टापुमा फिल्म स्टुडियो निर्माणका लागि २ सय बिघा जग्गा उपलब्ध गराएको कुरालाई मध्यनजर गर्दै बराह नगरपालकिाका प्रमुख निलम खनाललाई सम्मान गरिएको थियो ।
सम्मान तथा शुभकामना आदान प्रदान कार्यक्रमलाई सम्बोधन कार्यक्रमका प्रमुख अतिथी बराह नगरपालिकाका प्रमुख निलम खनालले आफ्नो नगरमा फिल्म स्टुडियोको निर्माण हुनु बराह नगरकै गौरभको विषय भएको उल्लेख गरेका थिए । प्रमुख खनालले चलचित्रकर्मीहरुसँगको सहकार्यमा कार्यसम्पादन गरेर अघि बढ्ने बताएका छन् ।
कार्यक्रममा बोल्दै चलचित्रकर्मी महासंघ प्रदेश १ का अध्यक्ष अरुण कुमार प्रधानले प्रदेश १ मा चलचित्र गतिविधिलाई निरन्तरता दिदै चलिचित्र क्षेत्रको विकासमा लागि पर्ने बताएका छन् । उनले चलचित्र क्षेत्रको विकासका लागि सबैको सहकार्य अपरिहार्य रहेको बताएका छन् ।
प्रदेश १ मै निर्माण भएर अन्तराष्ट्रिय अवार्ड हात पार्न सफल चलचित्र रेड मुन र के लाई प्रमाणपत्र सहित सम्मान गरिएको थियो । यस्ता चलचित्रले प्रदेश १ मा पनि उत्कृष्ट चलचित्र निर्माण गर्न सबिन्छ भन्ने उदाहरण प्रस्तुत गरेको भन्दै बिभिन्न अवार्ड जित्ने चलचित्रहरुलाई हौसला स्वरुप आउने दिनमा पनि सम्मान गरिने अध्यक्ष प्रधानको भनाई थियो । कार्यक्रममा निर्देशक चिरञ्जिबी बस्नेत,निर्माता तथा कलाकार पुष्प श्रेष्ठ,निर्देशक रबिन श्रेष्ठ, निर्माता नबिन मेन्याङ्बो, कलाकार माधब केसी लगायतले शुभकामना व्यक्त गरेका थिए । कार्यक्रममा प्रदेश १ का बिभिन्न चलचित्रकर्मी तथा पत्रकारहरुको उपस्थिति रहेको थियो ।
Discussion about this post