विशेष अनलाइन। उच्च अदालत पाटनले नेपाली चलचित्र ‘लालीबजार’ प्रदर्शनमा लगाइएको रोक विरुद्धको रिटमा सुनुवाइ गर्दै चलचित्र जाँच समिति (सेन्सर बोर्ड) बाट अनुमति दिने निर्णयको सक्कल फाइल झिकाउन आदेश दिएको छ। मङ्गलबार न्यायाधीशद्वय गीताप्रसाद तिम्सिना र दीपक खनालको संयुक्त इजलासले उक्त कागजात माग गर्दै आगामी छलफलका लागि वैशाख २३ गतेको पेसी तोकेको छ।
यसअघि अदालतले १५ वैशाखमा अन्तरिम आदेश जारी गर्दै चलचित्रको प्रदर्शनमा तत्कालका लागि रोक लगाएको थियो। सोही आदेशको निरन्तरता र विवादको समाधानका लागि अदालतले वादी र प्रतिवादी दुवै पक्षलाई छलफलका लागि बोलाएको हो। चलचित्र प्रदर्शनका लागि योग्य छ वा छैन भन्ने विषयमा जाँच समितिको निर्णय प्रक्रिया बुझ्न अदालतले फाइल मगाएको हो।
यो विवाद रोशनी नेपालीले दायर गरेको रिटबाट सुरु भएको हो। उनले चलचित्रका केही दृश्य र संवादहरूमा गम्भीर आपत्ति जनाउँदै यसलाई सार्वजनिक प्रदर्शन गर्न नहुने मागसहित अदालतमा मुद्दा दर्ता गरेकी थिइन्। उक्त मुद्दामा सञ्चार तथा सूचना प्रविधि मन्त्रालयलाई समेत विपक्षी बनाइएको छ, जसले चलचित्रको सेन्सर र अनुमति प्रक्रियामा मन्त्रालयको जिम्मेवारीलाई समेत केन्द्रमा राखेको छ।
निर्देशक यम थापाको निर्देशनमा तयार भएको यो चलचित्र १८ वैशाखदेखि देशभरका सिनेमा घरहरूमा प्रदर्शन गर्ने तयारी थियो। तर, प्रदर्शनको मुखैमा अदालतको रोक लगाउने आदेश आएपछि निर्माण पक्ष र वितरण टोली मर्कामा परेका छन्। वैशाख २३ गतेको छलफलपछि अदालतले चलचित्रको प्रदर्शन खुल्ने वा नखुल्नेबारे थप स्पष्ट निर्णय दिने अपेक्षा गरिएको छ।
Discussion about this post