विशेष अनलाइन । ललितपुरको बंगलामुखी मन्दिरमा मंगलबार बिहान चलचित्र ‘महाराजधिराज’ को भव्य शुभमुहूर्त गरिएको छ। बिहान ८ बजेदेखि सुरु भएको पूजा कार्यक्रम ११:११ बजेको शुभ साइतमा सम्पन्न भएको थियो। शङ्ख ध्वनि र पञ्चेबाजाको मङ्गल धुनका बीच चलचित्रको काम आधिकारिक रूपमा सुरु भएको घोषणा गरियो।
मुहूर्त कार्यक्रममा चलचित्रका मुख्य कलाकारहरू आर्यन सिग्देल, पुष्प खड्का, पूजा शर्मा र उषा रजक लगायतको उपस्थिति थियो। निर्देशक परिच्छेद सेनले लामो समयको मेहनतपछि यो चलचित्र निर्माण गर्न लागेका हुन्। उनले यस चलचित्रलाई आफ्नो ‘ड्रिम प्रोजेक्ट’ भन्दै यो एउटा सामाजिक विषयमा आधारित कथा (सोसल पिरयड ड्रामा) भएको बताएका छन्।
चलचित्रको छायांकन यही महिनाको २५ गतेदेखि सुनसरीबाट सुरु हुनेछ। सुनसरीको श्रीलंका टापुमा एक हप्ताको छायांकन सकेपछि टोली काठमाडौं फर्किनेछ। त्यसपछि काठमाडौं, भक्तपुर र कीर्तिपुरका विभिन्न ऐतिहासिक ठाउँहरूमा ७० दिन लगाएर चलचित्रको बाँकी छायांकन पूरा गरिने निर्माण पक्षले जनाएको छ।
यस चलचित्रमा ८० जनाभन्दा बढी कलाकारहरूको ठूलो समूहले अभिनय गर्दैछन्। जसमा रमेश उप्रेती, केकी अधिकारी, गजित बिष्ट, नीर शाह लगायतका चल्तीका कलाकारहरू रहेका छन्। धेरै कलाकार र बलियो कथा भएकाले यो चलचित्र निकै राम्रो बन्ने विश्वास प्रस्तुतकर्ता विराज विष्टले व्यक्त गरेका छन्।
छत्रेश्वर म्यानेजमेन्ट प्रालिको ब्यानरमा बन्ने यो चलचित्रमा रवि खड्का, शिवराज पौडेल र टोपेन्द्र विष्टको लगानी रहनेछ। निर्माण टिमले ‘महाराजधिराज’लाई आगामी फूलपातीको अवसर पारेर देशभरका हलहरूमा प्रदर्शन गर्ने तयारी गरेको छ।
Discussion about this post