विशेष अनलाइन । चलचित्र ‘आ बाट आमा २’ मा कलाकारहरूको लाइनअप थप मजबुत बन्दै गएको छ। विपना थापा, भारतीय कलाकार प्रदीप रावत (गजनी फेम), पल शाह र आकाश श्रेष्ठ जस्ता चर्चित अनुहारहरू यसअघि नै अनुबन्धित भइसकेका थिए। यसै क्रममा पछिल्लो पटक अभिनेता सविन श्रेष्ठ पनि यो परियोजनामा जोडिएका छन्। निर्देशक चन्द्र पन्त र सविनबीच मंगलबार लिखित सम्झौता भएसँगै निर्माण पक्ष उत्साहित देखिएको छ।
अभिनेता सविन श्रेष्ठ करिब तीन वर्षको अन्तरालपछि पर्दामा देखिन लागेका हुन्। सन् २०२२ मा प्रदर्शन भएको चलचित्र ‘म’ पछि उनले केही अन्य चलचित्रहरू साइन गरे पनि विविध कारणले ती निर्माण हुन सकेका थिएनन्। त्यसैले, ‘आ बाट आमा २’ लाई सविनको ‘कमब्याक’ चलचित्रका रूपमा हेरिएको छ। बुझिएअनुसार सविन यस पटक पर्दामा नकारात्मक भूमिका (भिलेन) मा देखिने सम्भावना छ, यद्यपि निर्माण पक्षले यसको औपचारिक पुष्टि गर्न भने बाँकी नै छ।
चलचित्रको निर्माण कार्यले पछिल्लो समय तीव्रता पाएको छ। गत सोमबार ललितपुरस्थित पाटनको बंगलामुखी मन्दिरमा स्क्रिप्ट र क्यामरा पूजा गर्दै चलचित्रको शुभ मुहूर्त सम्पन्न भइसकेको छ। गजित विष्ट र नरेन खड्काको समेत अभिनय रहने निश्चित भइसकेको यस चलचित्रमा मुख्य अभिनेत्रीको खोजी भने अझै जारी रहेको बताइएको छ। निर्देशक पन्तले कलाकार छनोटको प्रक्रियालाई अन्तिम रूप दिने प्रयास गरिरहेका छन्।
यो चलचित्र गत वर्ष प्रदर्शन भएको ‘आ बाट आमा’को सिक्वेलको रूपमा निर्माण हुन लागेको हो, जसको कथा र पटकथा स्वयं निर्देशक चन्द्र पन्तले तयार पारेका हुन्। आर्या इन्टरटेन्टमेन्टको ब्यानरमा निर्माण हुने यस चलचित्रको डिजिटल अधिकार ओएसआर डिजिटलले खरिद गरिसकेको छ भने वितरणको जिम्मेवारी आरआर फिल्म्सले सम्हाल्नेछ। चलचित्रको व्यवस्थापन पक्षलाई करण सिंहले प्रोडक्सन म्यानेजरका रूपमा हेरिरहेका छन्।
प्रदर्शन मितिको हकमा निर्माण पक्षले आगामी असोज ३० गते (फूलपातिको अघिल्लो दिन) लाई लक्षित गरेको छ। दशैँको अवसर पारेर सार्वजनिक प्रदर्शनमा आउने तयारीमा रहेको यो चलचित्रले दर्शकमाझ निकै चर्चा कमाउने अपेक्षा गरिएको छ। आगामी जेठ पहिलो साताबाट चलचित्रको छायांकन सुरु हुने तयारीमा रहेको छ।
Discussion about this post