विशेष अनलाइन । नेपाली चलचित्र बजारमा एउटा पुरानो रोग छ— निर्मातालाई आफ्नो कथाको वास्तविक दर्शक को हो भन्ने नै पत्तो हुँदैन। चलचित्र एउटा समुदायका लागि बनाइन्छ, तर यसको होहल्ला अर्कै भीडमा गरिन्छ। यही अलमलका कारण धेरै उत्कृष्ट सिर्जनाहरू हलमा रित्तो कुर्सी कुरेर बस्न बाध्य हुन्छन्। तर, आगामी जेठ १५ गतेबाट प्रदर्शनमा आउन लागेको चलचित्र ‘रोल नं १’ ले भने यो बेथिति तोड्दै सिधै आफ्नो लक्षित ‘टारगेट’ सम्म पुग्ने साहस देखाएको छ।
बालबालिकाको मनोविज्ञान र विद्यालय जीवनको धरातलमा बुनिएको यो चलचित्र यतिबेला सहरका चिल्ला सडक र महलमा होइन, मोफसलका विद्यालय र त्यहाँका कक्षाकोठाहरूमा गुञ्जिरहेको छ। ‘हामी आउँदैछौँ तपाईंको कक्षाकोठामा सुन्न तपाईंको मनका कुरा’ भन्ने भावनात्मक नाराका साथ चलचित्र टोलीले विद्यार्थीमाझ सिधै उपस्थिति जनाएको छ। टल्किने पोस्टर टाँसेर दर्शक कुर्ने परम्परागत शैलीलाई त्याग्दै टोलीले सिधै ‘क्लासरुम’ को ढोका ढक्ढक्याएको हो।
गत वैशाख २१ गतेबाट पूर्वी नेपालका जिल्लाहरूमा सुरु भएको यो विशेष अभियानले झापा, मोरङ र सुनसरीका विद्यार्थीहरूमा निकै ठुलो तरंग पैदा गरेको छ। निर्माता विनोद पौडेलका अनुसार दमक, विर्तामोडलगायतका क्षेत्रका स्कुलमा पुग्दा विद्यार्थीहरूको प्रतिक्रिया उत्साहजनक देखिएको छ। कलाकारहरूले केवल आफ्नो कुरा सुनाउने मात्र होइन, विद्यार्थीका मनका भावना सुन्ने र उनीहरूसँगै अन्तरक्रिया गर्ने यो शैली नेपाली चलचित्र प्रचारको इतिहासमा नौलो प्रयोग हो।
यस अभियानलाई अझ रोचक बनाउन संगीतकार तथा गायक प्रशान्त सिवाकोटीले कक्षाकोठामै चलचित्रको शीर्ष गीत गाएर विद्यार्थीलाई सांगीतिक माहोलमा जोडेका छन्। कलाकारहरू मुकुन भुसाल, रेणु योगी र कर्मा लामालगायतको टोलीले विद्यार्थीमाझ चलचित्रको टिजर र गीत मात्र देखाएको छैन, बरु एउटा जीवन्त सम्बन्ध समेत गाँसेको छ। पर्दामा देखिने पात्रहरूलाई आफ्नै कक्षामा पाउँदा बालबालिकाहरूमा चलचित्रप्रति निकै ठुलो आकर्षण देखिएको छ।
जोन योञ्जनको निर्देशन र महेश दवाडीको लेखन रहेको यस चलचित्रमा सुशांक मैनाली, सिर्जना अधिकारी, निर्भिक रेग्मी, रिन्चेन लामालगायतका कलाकारहरूको अभिनय रहेको छ। कीर्तिमानी चलचित्र ‘पूर्ण बहादुरको सारङ्गी’ का निर्माता विनोद पौडेल र जान्वी पौडेलको लगानी रहेकाले पनि यस चलचित्रले गुणस्तरीय कथा पस्कनेमा दर्शक ढुक्क छन्। लगानीकर्ताले आफ्नो दर्शक को हो भन्ने स्पष्ट बुझेर गरिएको यो लगानीले सही प्रतिफल पाउने संकेत देखिएको छ।
‘भीड जम्मा गर्नु’ र ‘दर्शक बनाउनु’ फरक कुरा हुन् भन्ने उदाहरण यो चलचित्रले दिएको छ। विद्यालयका कक्षाकोठासम्म पुगेर गरिएको यो ‘ग्रास रुट’ प्रचारले आगामी जेठ १५ मा हलसम्म कत्तिको विद्यार्थी र अभिभावक तान्छ, त्यो हेर्न बाँकी नै छ। तर, लक्षित वर्गको पहिचान र उनीहरूसम्म पुग्ने यो प्रभावशाली शैलीले नेपाली चलचित्र उद्योगका अन्य निर्मातालाई पनि गतिलो पाठ सिकाएको छ।
Discussion about this post