विशेष अनलाइन । नेपाली चलचित्र जगतमा एक्सन विधालाई नयाँ उचाइमा पुर्याउन सफल ‘१२ गाउँ’ को अभूतपूर्व सफलतापछि यसको सिक्वेलको छायांकन औपचारिक रूपमा प्रारम्भ भएको छ। अभिनेता तथा निर्देशक विराज भट्टले दर्शकको तीव्र प्रतीक्षालाई सम्बोधन गर्दै बुधबार एक भव्य गीतको छायांकनसँगै ‘१२ गाउँ २’ को निर्माण कार्य सुरु गरेका हुन्। निर्माण पक्षले चलचित्रको प्रदर्शन मिति आगामी वर्षको दशैँ अन्तर्गत फूलपातीलाई लक्षित गर्दै ‘लक’ गरिसकेको छ, जसले गर्दा चाडपर्वको समयमा दर्शकले उत्कृष्ट मनोरञ्जन पाउने निश्चित देखिएको छ।
यसपटकको प्रस्तुतिलाई अघिल्लो भागभन्दा अझ परिष्कृत र भव्य बनाउन निर्माण टोलीले विशेष ध्यान दिएको छ। काठमाडौंको आधुनिक परिवेशदेखि सिन्धुपाल्चोक र चितवनका प्राकृतिक लोभलाग्दा स्थानहरूमा चलचित्र खिचिनेछ। विशेषगरी विराज भट्ट र समिर भट्टको जोडीबाट पर्दामा देखिने शक्तिशाली एक्सन र स्टन्ट यस चलचित्रको मुख्य आकर्षण रहनेछ। प्राविधिक पक्षलाई अन्तर्राष्ट्रिय स्तरको बनाउन निर्माण टोलीले कुनै कसर बाँकी नराखेको दाबी गरेको छ।
चलचित्रमा कलाकारहरूको बलियो उपस्थिति रहनेछ। विराज र समिरका साथमा अनुप विक्रम शाही, कृशु ‘काफिया’ शाही, वर्षा इटानी, र सुनिल पोखरेल जस्ता स्थापित अनुहारहरूले प्रमुख भूमिका निर्वाह गर्दैछन्। साथै, प्रकाश शाह, खुसी कार्की, कनिज कोइराला र पूर्णबहादुर गन्धर्व लगायतका कलाकारहरूको अभिनयले कथालाई थप सशक्त बनाउने अपेक्षा गरिएको छ। सन्तोष सरकारको लेखन र महेश पौडेलको छायांकन रहेको यस चलचित्रमा इस्टनर सिल्वा र शंकर महर्जनको द्वन्द्व निर्देशन रहनेछ।
सङ्गीत र गायनतर्फ पनि चलचित्र निकै सबल देखिएको छ। सुगम पोखरेल, समीक्षा अधिकारी र निशान भट्टराई जस्ता चर्चित गायकहरूको स्वर यसमा समेटिएको छ। सियोन श्रेष्ठको नृत्य निर्देशन र युग भुसालको सङ्गीत संयोजनले चलचित्रलाई साङ्गीतिक रूपमा पनि उत्कृष्ट बनाउनेछ। चलचित्रको वितरण काठमाडौं भित्र काफिया फिल्म्स र उपत्यका बाहिर कुबेर फिल्म्सले गर्ने जिम्मेवारी लिएका छन्।
Discussion about this post