चलचित्र निर्माण गर्दै गायक प्रकाश सपुत,प्रकाश र स्वस्तिमाको मुख्य भूमिका रहने

विशेष अनलाइन । गायक प्रकाश सपुतले चलचित्र निर्माणको घोषणा गरेका छन् । काठमाण्डौमा एक कार्यक्रमको आयोजना गर्दै गायक सपुतले चलचित्र ‘वसन्त’ निर्माणको घोषणा गरेका हुन् ।

चलचित्र विकास कोर्डका अध्यक्ष भुवन केसी, लोक तथा दोहोरी गीत प्रतिष्ठानकी अध्यक्ष रिता थापालगायतको उपस्थितमा सपुतले चलचित्र निर्माणको घोषणा गरेका हुन् ।

निर्माण हुन लागेको चलचित्रको निर्देशन पनि प्रकाश सपुतले नै गर्दैछन् । चलचित्रको कथा, संगीत पनि सपुतकै हुने छ । चलचित्रको छायांकन आगामी भदौदेखि थालिने बताइएको छ । चलचित्रमा प्रकाश आफै मुख्य भुमिकामा देखिने छन् भने नायिकामा स्वस्तिमा खड्का हुने छिन् । चलचित्रका अन्य कलाकारहरुमा अनुप बराल, प्रकाश घिमिरे र कमलमणि नेपाल लगायत रहने छन् ।

गलबन्दी प्रोडक्सनको ब्यानरमा बन्ने चलचित्रका कार्यकारी निर्माता मोहन विक, अनुरोध भट्टराई र नेन्सी शेरचन छन् । चलचित्र २०८१ को चैते दसैँमा प्रदर्शनमा ल्याउने घोषणा निर्माण पक्षले गरेको छ ।

कार्यक्रममा बोर्ड अध्यक्ष भुवन केसीले प्रकाशले आगामी दिनमा चलचित्र क्षेत्र हाँक्ने क्षमता राखेको बताए । उनले चलचित्र निर्देशमा चुनौती धेरै भएको उल्लेख गर्दै डटेर सामना गर्न प्रकाशलाई सुझाव समेत दिएका छन् ।