छायांकन अघिनै प्रदर्शन मिति घोषणा,महाशिवरात्रिमा‘सक्किगोनि’ समूहको ‘लाज शरणम्’

विशेष अनलाइन । हाँस्य सिरियल ‘सक्किगोनि’ समूहले निर्माण गर्न लागेको  चलचित्र‘लाज शरणम्’को प्रदर्शन मिति तय गरिएको छ । छायांकनको तयारीमा रहेको चलचित्र निर्माण टिमले छायांकनमा जानुभन्दा पहिले नै चलचित्र प्रदर्शन मिति तय गरेको हो ।

शुक्रबार एक थिम पोस्टर सार्वजनिक गर्दै महाशिवरात्रिको अवसर पारेर फाल्गुन  १४ गते चलचित्र प्रदर्शन गर्ने जानकारी निर्माण टिमले दिएको छ । चलचित्रको छायांकन भने दशैंभन्दा अगाडि नै पूरा गर्ने योजना रहेको बताइएको छ ।

सार्वजनिक पोस्टरमा चलचित्र कस्ले निर्देशन गर्दै छ भन्ने विषय समेत गोप्य राखिएको छ । यश अघि यही समुहले चलचित्र ‘फनफनी’ निर्माणको घोषणा गरेको थियो । उक्त चलचित्रको निर्देशन निश्चल बस्नेतले गर्ने तय भएको बताइएको थियो । तर निश्चल बस्नेतले चलचित्रबाट हात झिकेपछी त्यो प्रोजेक्ट नै रोकियो ।

चलचित्रमा ‘सक्किगोनि’ सिरियलकै कलाकारहरु कुमार कट्टेल, अर्जुन घिमिरे, सागर लम्साल, दीपक आचार्य, हरिश निरौला लगायतकै अभिनय रहने पक्का छ । अन्य केही बाहिरका कलाकारहरु पनि चलचित्रमा रहनेछन् । तर को को हुनेछन् भन्ने विषय भने गोप्य राखिएको छ ।