विशेष अनलाइन । नेपाल तामाङ युवा घेदुङ इटहरी उपमहानगर कार्यसमिति सुनसरीले २५६८ औ बुद्ध जयन्ती भव्यताका साथ मनाउने तयारी गरेको छ । बुद्ध जयन्तीको अवसर पारेर बुद्ध प्रवचन तथा सांस्कृतिक कार्यक्रमको आयोजनाको तयारी भइरहेको इटहरीमा पत्रकार सम्मेलन गरी जानकारी दिइयो । इटहरीको सङ्गीत चोकमा रहेको होटेल इन्टुरिस्टमा आयोजना गरिएको पत्रकार सम्मेलनमा जेठ ९ गते बुधवारका दिन सांस्कृतिक कार्यक्रमको आयोजना गर्न लागिएको जानकारी दिइएको हो ।
कार्यक्रममा चर्चित गायक तथा सङ्गीतकार उर्गेन दोङको समेत प्रस्तुति रहने बताइएको छ । कार्यक्रमलाई नेपाल तामाङ युवा घेदुङ जिल्ला सुनसरी समन्वय समिति र इटहरी वडा नम्बर १९ र २० का युवाहरूले व्यवस्थापन गर्नेछन् । कार्यक्रम इटहरी २० स्थित तरहराको महायान साङगा छोईलिङ गुम्बाको खेल मैदानमा आयोजना हुने छ ।
नेपाल तामाङ युवा घेदुङ इटहरीका अध्यक्ष सुमन तामाङका अनुसार कार्यक्रममा प्रवेश निशुल्क गरिएको छ । हामीले पैसा कमाउने उद्देश्यले नभई गौतम बुद्ध नेपालमा जन्मिएका हुन् भन्ने सन्देश विश्वमाझ पुर्याउने लक्ष सहित कार्यक्रमको आयोजना गर्न लागेका हौँ अध्यक्ष तामाङले भने ।
कार्यक्रममा उपस्थित विभिन्न वक्ताहरूले गौतम बुद्ध बुद्धिस्टहरूको मात्र नभई सबै नेपालीहरूको साझा गौरव भएको उल्लेख गर्दै बुद्ध जयन्तीलाई भव्य बनाउन सहयोगका लागि सबैलाई अनुरोध गरेका छन् ।
Discussion about this post