मुख्यमन्त्री कार्कीको अनुरोधसँगै प्रतिबद्धताःकोशी प्रदेशमा चलचित्र विकास बोर्ड स्थापना गर्छौँ,कलाकार एक ढिक्का भएर आउनुहोस्

मनोज दाहाल । कोशी प्रदेशका मुख्यमन्त्री हिक्मतकुमार कार्कीले प्रदेशमा चलचित्र विकास बोर्ड  स्थापना गर्न प्रदेश सरकार प्रतिबद्ध रहेको बताएका छन् । झापाको बिर्तामोडमा आन्तरिक मामिला तथा कानुन मन्त्रालय कोशी प्रदेशले आयोजना गरेको कोशी प्रदेशस्तरीय चलचित्र महोत्सवको उद्घाटन समारोहलाई सम्बोधन गर्दै मुख्यमन्त्री कार्कीले चलचित्र क्षेत्रको विकासका लागि आफू र आफ्नो सरकार सदैव तत्पर रहेको बताएका हुन् ।

‘हामी प्रदेशमा चलचित्र प्रवर्द्धनका लागि चलचित्र विकास बोर्ड स्थापना गर्नका लागि बजेट छुट्टाउने प्रतिबद्ध छौँ । तर, चलचित्रकर्मीहरू पनि एक हुनु पर्‍यो । चलचित्रकर्मीको उद्देश्य एउटै हुनुपर्‍यो।’ उनले भने, ‘तपाईंहरूसंग हाम्रो पनि माग छ। तपाईँहरू एक ढिक्का भएर आउनुहोस्। राम्रो काम गर्नुहोस्। चलचित्र विकास बोर्ड गठन गर्न प्रदेश सरकार तयार छ।’

‘सबै चलचित्रकर्मीहरूलाई एउटै दायरमा ल्याएर एक सूत्रीय माग सहित आउनका लागि म दिनेश डिसी र नवल नेपाल लगायतका चलचित्रकर्मीहरूलाई नेतृत्वका लागि अनुरोध गर्छु।’ मुख्यमन्त्री कार्कीले भने । मुख्यमन्त्री कार्कीले चलचित्र समाजलाई देखाउने ऐना भएको उल्लेख गर्दै विगतमा बनेका चलचित्रहरूले आफूलाई समेत धेरै प्रभावित बनाएको बताए ।

मुख्यमन्त्री कार्कीले भने, ‘बजेट विनियोजन गर्ने समय छ । के के गर्दा चलचित्र क्षेत्रको विकास हुन्छ ? त्यसका लागि प्रदेश सरकारले केके गर्नुपर्छ ? कुन कुन शीर्षकमा बजेट छुट्टाउनुपर्छ भन्नुहोस् हामी छुट्याउछौँ ।’

आन्तरिक मामिला तथा कानुन मन्त्री लिलाबल्लभ अधिकारीले चलचित्र मनोरञ्जनका लागि मात्र नभएर आन्तरिक तथा वाहिय पर्यटन प्रवर्धनमा समेत उल्लेख्य सुधार ल्याउन सक्ने गतिलो माध्यम भएको उल्लेख गरे ।  ‘हामीले पहिलो पटक चलचित्र क्षेत्रको विकासका लागि यो प्रयास गर्दै छौँ । छोटो समयका बाबजुद हामी कार्यक्रम गर्न सफल भएका छौँ । यस पटक भएका कमीकमजोरीहरूबाट पाठ सिक्दै अर्को पटक अझै भव्य कार्यक्रम गर्ने उद्देश्य सहित अघि बढ्न सबैलाई आग्रह गर्छु’, मन्त्री अधिकारीले भने ।

जेठ ६ गतेबाट सुरु भएको  महोत्सव जेठ ११ गतेसम्म झापा, मोरङ, सुनसरीका विभिन्न स्थानहरूमा विविध कार्यक्रम गर्दै सञ्चालन हुने छ भने समापन विराटनगरमा हुने बताइएको छ । उद्घाटन कार्यक्रममा विभिन्न झाँकी सहित स्थानीय तथा राष्ट्रिय कलाकारहरूले प्रस्तुति दिएका थिए ।  महोत्सव उद्घाटन सत्रको व्यवस्थापन केवल तामाङ नेतृत्वको नेपाल चलचित्र संघ गरेको थियो भने अन्य स्थानमा हुने कार्यक्रमहरूको व्यवस्थापन अरुण कुमार प्रधान नेतृत्वको नेपाल चलचित्रकर्मी महासंघले गरिरहेको छ ।