‘भाइरल गोर्खे’ को प्रिमियर: सामाजिक सञ्जालको विकृतिमाथि सौगात र सृष्टिको व्यङ्ग्य

विशेष अनलाइन । काठमाडौँको न्यूरोडस्थित रञ्जना सिनेप्लेक्समा नेपाली चलचित्र ‘भाइरल गोर्खे’ को भव्य प्रिमियर सम्पन्न भएको छ। आगामी बिहीबार माघे संक्रान्तिको अवसर पारेर देशभर प्रदर्शन हुन लागेको यस फिल्मको विशेष प्रदर्शनीमा चलचित्र क्षेत्रका चर्चित व्यक्तित्वहरूको उपस्थिति रहेको थियो। प्रिमियरमा पुगेका अतिथि तथा सञ्चारकर्मीहरूले फिल्मको विषयवस्तु र कलाकारहरूको अभिनयको प्रशंसा गरेका छन्।

प्रिमियर समारोहको मुख्य आकर्षणको रूपमा कलाकार सौगात मल्ल र सृष्टि श्रेष्ठ रहेका थिए। सम्बन्ध विच्छेद (ब्रेकअप) पछि पुनः एकसाथ पर्दामा देखिएको यो जोडीले सबैको ध्यान खिचेको थियो। समारोहमा सृष्टि नेवारी पोशाकमा सजिएर निकै आकर्षक देखिएकी थिइन् भने सौगात दौरा सुरुवालमा सजिएर मौलिक नेपालीपनमा प्रस्तुत भएका थिए। उनीहरूसँगै चर्चित भ्लगर सिसन बानियाँ लगायतका अन्य सेलिब्रेटीहरूले पनि फिल्म हेर्न पुगेर निर्माण पक्षलाई शुभकामना दिएका थिए।

निगम श्रेष्ठको निर्देशनमा तयार भएको यस चलचित्रले वर्तमान समयको सामाजिक सञ्जाल मोहलाई मुख्य विषय बनाएको छ। चलचित्रले विशेषगरी सामाजिक सञ्जालमा ‘भाइरल’ हुनका लागि गरिने मरिहत्ते र त्यसले व्यक्तिगत एवं सामाजिक जीवनमा पार्ने गहिरो प्रभावलाई व्यङ्ग्यात्मक शैलीमा प्रस्तुत गरेको छ। प्रविधिले मानिसको सोच्ने तरिका र व्यवहारमा कस्तो परिवर्तन ल्याएको छ भन्ने कुरालाई चलचित्रमा रोचक ढंगले देखाइएको छ।

माघे संक्रान्तिलाई लक्षित गर्दै प्रदर्शनमा आउन लागेको ‘भाइरल गोर्खे’ लाई लिएर निर्माण टोली निकै उत्साहित देखिएको छ। सामाजिक यथार्थ र हास्यलाई मिश्रण गरिएको यो फिल्मले दर्शकलाई मनोरञ्जनका साथै एउटा सन्देश पनि दिने अपेक्षा गरिएको छ।