विशेष अनलाइन । बलिराम चौहानको निर्देशनमा तयार भएको चलचित्र ‘द ब्लू लाइट’ को पहिलो गित ‘कुन हावाले’ सार्वजानिक भएको छ। वियोगको गहिरो भाव समेटिएको यस गीतमा सितुस्मा अधिकारीका मर्मस्पर्शी शब्द, एसडी योगीको सुमधुर संगीत र सलिना बिकेको स्वर रहेको छ। विशेषगरी आफूले चाहेको व्यक्ति अचानक टाढा हुँदा मनमा उब्जने छटपटी र मानसिक पीडालाई गीतले प्रस्तुत गरेको छ।
सार्वजनिक भिडियोमा चलचित्रका मुख्य पात्रहरू अर्पण थापा र बेनिशा हमाल बीचको प्रेम र त्यसपछि उत्पन्न विछोडको कथालाई बडो कारुणिक ढंगले चित्रण गरिएको छ। भिडियोमा अभिनेत्री बेनिशा हमाललाई अर्पणको यादमा तड्पिरहेकी एक गर्भवती महिलाको रूपमा प्रस्तुत गरिएको छ, जसले चलचित्रको भावनात्मक पक्षलाई थप बलियो बनाएको छ।
मनोवैज्ञानिक थ्रिलर विधामा निर्माण गरिएको चलचित्रमा अर्पण र बेनिशाका साथै आयुष्मान देशराज जोशी, सृष्टि श्रेष्ठ, महेश त्रिपाठी र सुरक्षा इटानी जस्ता स्थापित कलाकारहरूको सशक्त अभिनय रहनेछ। कलाकारहरू ग्रिस्मा कटुवाल र सहारा शर्माले पनि यस चलचित्रमा महत्वपूर्ण भूमिका निर्वाह गरेका छन्। निर्देशक चौहान स्वयंले निर्माण गरेको यस चलचित्रमा भोलानाथ कटुवाल र रमन ग्रे सह-निर्माताका रूपमा रहेका छन् भने अभिनेत्री बेनिशा हमाल र नरेन्द्र मैनाली कार्यकारी निर्माता हुन्।
चलचित्रमा नरेन्द्र मैनालीको छायांकन, लोकेश बज्राचार्यको सम्पादन, मोहक श्रेष्ठको ब्याकग्राउन्ड स्कोर, एसडी योगीको संगीत, रोशन श्रेष्ठको द्वन्द्व निर्देशन तथा सुनिल क्षेत्रीको नृत्य निर्देशन रहेको छ । यसअघि सार्वजनिक भएको टिजरमा देखाइएको द्वन्द्व र मानसिक तनावले दर्शकमाझ चलचित्रप्रति निकै ठूलो कौतुहलता र प्रभाव जमाइसकेको छ।
आगामी माघ १६ गतेबाट देशभरका सिनेमा हलमा प्रदर्शन हुने तयारीमा रहेको यो चलचित्रले नेपाली सिने जगतमा मनोवैज्ञानिक थ्रिलरको नयाँ स्वाद दिने अपेक्षा गरिएको छ। प्रेम, रहस्य र पारिवारिक तनावको फ्युजन मानिएको ‘द ब्लू लाइट’ लाई लिएर दर्शक र समीक्षक दुवै उत्साहित देखिएका छन्। वियोगान्त गीतबाट सुरु भएको यसको प्रचारले प्रदर्शनको समयसम्म कस्तो चर्चा बटुल्छ, त्यो हेर्न बाँकी नै छ।
Discussion about this post