विशेष अनलाइन। नयाँ वर्ष २०८३ को पहिलो दिनको अवसर पारेर अभिनेत्री तथा निर्मात्री पूजा शर्माले आफ्नो नयाँ चलचित्रको घोषणा गरेकी छिन्। नाईटिङ्गेल ईन्टरटेन्मेन्ट प्रालि र पूजा शर्मा प्रोडक्सनको संयुक्त व्यानरमा निर्माण हुन लागेको यस चलचित्रको नाम ‘रत्यौली’ राखिएको छ। यो घोषणासँगै नेपाली चलचित्र क्षेत्रमा नयाँ उत्साह थपिएको छ।
यस चलचित्रको सबैभन्दा रोचक पक्ष कलाकारको छनोट रहेको छ। ‘रत्यौली’मा पूजा शर्मा र अभिनेता विजय बरालको जोडी पहिलो पटक पर्दामा देखिने पक्का भएको छ। सार्वजनिक गरिएको पोस्टरमा पूजा दौरा सुरुवाल, नेपाली टोपी र ओठमा जुँगासहितको भिन्न अवतारमा देखिएकी छिन् भने विजयसँगै नाचिरहेको दृश्यले चलचित्र निकै रमाइलो हुने संकेत गर्दछ।
चलचित्रको निर्देशन मुस्कान ढकालले गर्नेछन् भने यसलाई सुरज आचार्यले निर्माण गर्दैछन्। निर्माण पक्षका अनुसार सुरज आचार्य नेपाली चलचित्र क्षेत्रमा ३२ वर्षदेखि सक्रिय व्यक्तित्व हुन्। उनले सयभन्दा बढी नेपाली चलचित्रमा प्रोडक्सन डिजाइनरको रूपमा काम गर्नुका साथै ‘उचाई’ र ‘फर्जी’ जस्ता चर्चित भारतीय परियोजनाहरूमा लाइन प्रोड्यूसरको अनुभव समेत बटुलेका छन्।
यसअघि ‘मेरो लभ स्टोरी’ र ‘कर्मयोद्धा’ जस्ता चलचित्रमा सह-निर्माताको रूपमा काम गरिसकेका आचार्यले ‘रत्यौली’लाई भव्य रूपमा निर्माण गर्ने तयारी गरेका छन्। चलचित्रको कथावस्तु र अन्य प्राविधिक पक्षबारे विस्तृत जानकारी गोप्य राखिए पनि पूजा र विजयको अनौठो जोडीले दर्शकमाझ ठूलो चासो र कौतुहलता जगाएको छ।
अहिलेलाई निर्माण टोलीले पोस्टरमार्फत प्रारम्भिक जानकारी मात्र साझा गरेको छ। चलचित्रको छायांकन र प्रदर्शन मितिबारे आगामी दिनमा थप घोषणा गरिने बताइएको छ।
Discussion about this post