विशेष अनलाइन । फिल्म ‘पूर्णबहादुरको सारङ्गी’ तथा ‘अभिमन्यु’ का निर्माता विनोद पौडेलले ‘रजतपट’ कार्यक्रमका सञ्चालक प्रकाश सुवेदीमाथि गम्भीर आरोप लगाएका छन्।
पौडेलका अनुसार, रकम दिए मात्र फिल्मको प्रमोशन गर्ने र रकम नदिएपछि निर्माण टिम तथा लगानीकर्ताको चरित्र हत्या गर्ने गतिविधि सुवेदीले गर्दै आएको आरोप लागेको हो। उनले सामाजिक सञ्जालमार्फत सार्वजनिक गरेको वक्तव्यमा यसबारे विस्तृत खुलासा गरेका छन्।
पौडेलको आरोप अनुसार घटनाक्रम यसरी सुरु भयो
उनको नयाँ चलचित्र ‘अभिमन्यु’को मिडिया कोअर्डिनेटरलाई रजतपट टिमले प्रमोशनका लागि बजेट छुट्याइएको छ कि छैन भनेर सोध्दै रकम मागिएको थियो। तर उनले रकम नदिने निर्णय गरेपछि, उक्त निर्णयको ‘बदला’स्वरूप सुवेदीले आफ्नो बारेमा नकारात्मक रिपोर्ट प्रसारण गरेको पौडेलको दाबी छ।
पौडेल भन्छन्— “धेरै निर्माता यस्तो अवस्थामा चुप लाग्छन्, किनकि रिलिजपछि फिल्मबारे नराम्रो रिपोर्ट आउला भन्ने डर हुन्छ। तर मलाई त्यसको मतलब छैन। मसँग प्रमाण छ— एउटै निर्माताबाट पैसा लिएर फेरि त्यही निर्मातामाथि आक्रमण गरेको मैले देखेको छु।”
उनको भनाइमा, ‘पूर्णबहादुरको सारङ्गी’ले रजतपटको प्रमोशनबिना पनि बक्स अफिसमा उत्कृष्ट सफलता पाएको थियो।
“रजतपटमा पैसा दिएर मात्र फिल्म हिट हुने होइन,” पौडेलले भने। “हामी हाम्रो हिसाबले मार्केटिङ गर्छौं, अरूको पैसा धम्क्याएर लिनु वा चिप्लो घस्नु हाम्रो काम होइन।”
पौडेलले अघिल्लो फिल्म ‘पूर्णबहादुरको सारङ्गी’को आम्दानी र खर्चबारे पनि केही प्रश्न उठाउँदै, “कसले कतिको बुस्टिङ गर्यो भन्ने कुरा सुवेदीलाई थाहा नहोला र?” भनेर प्रत्यक्ष चुनौति दिएका छन्।
यो विवादबारे प्रकाश सुवेदी वा रजतपट टिमले भने अहिलेसम्म कुनै आधिकारिक प्रतिक्रिया दिएका छैनन्।
Discussion about this post