विशेष अनलाइन । नेपाली चलचित्र क्षेत्रमा एक कलाकारको भविष्य एकै फिल्मले बदल्न सक्छ भन्ने सन्देश दिन्छन् – महेश त्रिपाठी। हालै रिलिज भएको फिल्म ‘लाज शरणम्’ मा उनले कर्णाली क्षेत्रको दुःखी पात्रको भूमिकामा दिएको दमदार प्रस्तुतिले दर्शकमात्र होइन, निर्माता-निर्देशकहरूको पनि ध्यान तानेको छ।
यस भूमिकाबाट महेश त्रिपाठीको अभिनय यात्रा नयाँ दिशातर्फ मोडिएको छ। लामो समयदेखि संघर्षरत रहँदासमेत विशेष चर्चा नपाएका उनले यस फिल्मपछि छोटो समयमै करिअरको उच्च विन्दु छोएका छन्। त्रिपाठीले हालै एक अन्तर्वार्तामा खुलासा गरेअनुसार, ‘लाज शरणम्’ रिलिजपछिका चार महिनामा उनलाई झन्डै ३० वटा फिल्मबाट प्रस्ताव आएको छ। तीमध्ये छ वटा फिल्ममा मात्र उनले काम गर्ने सहमति जनाएका छन्।
उनले भने, “कतिपय स्क्रिप्ट राम्रो थिए, तर सबैमा काम गर्नु सम्भव थिएन। अहिले म छ फिल्ममा काम गर्दैछु, जसमा ‘ककाकिकी’ पनि पर्छ।” बाँकी फिल्महरूको आधिकारिक घोषणा भने हुन बाँकी छ।
‘लाज शरणम्’मा उनले निर्वाह गरेको भूमिकाका लागि उनले झन्डै २० केजी तौल घटाएका थिए। “७५ केजीबाट म १९.५ केजी घटाएर भूमिकामा ढल्ने प्रयासमा लागेँ,” त्रिपाठीले भने। यतिसम्मको शारीरिक परिश्रम र मानसिक तयारीले उनलाई अभिनयमा ‘परफेक्ट स्टार’को ट्याग समेत दिलाएको छ।
यद्यपि, महेशको अभिनय यात्रा ‘लाज शरणम्’ बाट सुरु भएको होइन। यसअघि ‘हल्कारा’, ‘चपली हाइट ३’, ‘फेरि रेशम फिलिली’ जस्ता फिल्ममा पनि उनको अभिनयको प्रशंसा हुँदै आएको थियो। तर ‘लाज शरणम्’ ले भने उनलाई मुख्यधारमा स्थापित गराइदिएको छ।
सामाजिक सञ्जालदेखि लिएर दर्शकको प्रतिक्रिया र फिल्मकर्मीहरूको साथले महेश त्रिपाठी अहिले नेपाली फिल्म उद्योगमा सबैभन्दा व्यस्त र चर्चित कलाकारमध्ये एक बनेका छन्।
Discussion about this post