विशेष अनलाइन । अक्सर हाम्रो समाजमा एउटा मानक छ— यदि तिमी कक्षामा ‘रोल नम्बर १’ हौ भने तिमी सफल छौ, नत्र तिम्रो कुनै अस्तित्व छैन। यही शैक्षिक दबाब र सामाजिक प्रतिष्ठाको कुरुप ऐना बोकेर आएको छ चलचित्र ‘रोल नं १’। ‘पूर्णबहादुरको सारङ्गी’मार्फत सफलताको शिखर चुमेका निर्माता विनोद पौडेलको यो नयाँ प्रस्तुतिले शिक्षा क्षेत्रको तीतो यथार्थलाई पर्दामा उतार्ने संकेत गरेको छ।
हालै सार्वजनिक गरिएको चलचित्रको शीर्ष गीतले नेपाली घरघरको कथा बोल्छ। प्रशान्त शिवाकोटीको स्वर, शब्द र संगीतमा सजिएको यस गीतले ‘किताबी किरो’ बनाउने होडबाजी र श्रेणी (र्याङ्किङ) को पछाडि कुद्ने हाम्रो सोचमाथि कडा प्रहार गरेको छ। ‘न्याउली वनैमा’ जस्ता हिट गीतका सर्जक शिवाकोटीले यसपटक भावुकतासँगै एउटा गम्भीर सामाजिक प्रश्न समेत उब्जाएका छन्।
गीतको भिडियोमा एउटा बालकको मासूमियत र उसको काँधमा थोपरिएको ‘पढाइको भारी’लाई मर्मस्पर्शी ढंगले देखाइएको छ। ‘अरु केही गर्नु पर्दैन, थपक्क बस्ने र खुरुखुरु पढ्ने’ भन्दै बुबाले दिने निर्देशनले धेरै दर्शकलाई आफ्नै बाल्यकालको याद दिलाउँछ। बालकले आफ्ना साना-साना इच्छा र रहरहरूलाई दबाएर कसरी समाज र परिवारको लागि ‘मेसिन’ बन्नुपर्छ भन्ने कुरा भिडियोमा प्रस्ट देखिन्छ।
जोन योञ्जनको निर्देशनमा बनेको यस चलचित्रले केवल एउटा विद्यालयको कथा मात्र नभई आर्थिक रूपमा विपन्न परिवारको सपना र संघर्षको गाथा पनि समेटेको बुझ्न सकिन्छ। मुकुन भुसाल, सुशांक मैनाली, रेणु योगी र सिर्जना अधिकारी जस्ता सशक्त कलाकारहरूको अभिनय रहेको यो चलचित्रमा बाल कलाकारहरूको पनि उपस्थिति छ।
विनोद पौडेल र जान्वी पौडेलको लगानी रहेको यस चलचित्रको कथा महेश दवाडीले लेखेका हुन्। सह-निर्माताका रूपमा छत्रमाया गिरी र रमेश चौलागाईं जोडिएका छन्। समाजले कोरेको ‘सफलताको रेखा’ भन्दा बाहिर निस्कन खोज्ने यो चलचित्रले शिक्षाको वास्तविक परिभाषा खोज्ने प्रयास गर्ने देखिएको छ।
Discussion about this post