विशेष अनलाइन । चलचित्र ‘घरज्वाइँ’को क्यारेक्टर पोस्टर सार्वजनिक गरिएको छ । एक पोस्टरमा चलचित्रका अभिनेता दयाहाङ राईलाई प्रस्तुत गरिएको छ भने अर्को पोस्टरमा दुई शीर्ष पात्र दयाहाङ राई र मिरुना मगरलाई प्रस्तुत गरिएको छ । पूर्वी रुकुमको तकसेराको मगर ग्रामीण बस्तीमा छायांकन गरिएको चलचित्र ‘घरज्वाइँ’को पोस्टर हेर्दा चलचित्र ग्रामीण परिवेशमा निर्माण भएको बुझ्न सकिन्छ ।
पहिलो पोस्टरमा अभिनेता दयाहाङ केही रिसाएको मुद्रामा बन्दुक बोकेको देखाइएको छ भने दोस्रो पोस्टरमा दयाहाङ र मिरुना डोको बोकेर निस्किएको देख्न सकिन्छ । डोको बोकेको पोस्टरमा दयाहाङले मिरुनालाई अघी लगाएका छन् ।
निर्माता जनक घर्ती मगरले निर्माण गरेको चलचित्र ‘घरज्वाइँ’को निर्देशन अनिल बुढा मगरले गरेका हुन् । चलचित्रमा दयाहाङ र मिरुनाका अलावा बुद्धि तामाङ, शिशिर बाङ्देल, पुष्कर गुरुङ, भोलाराज सापकोटा, राज थापा काउचा, कविता आले, शिला आले, अनु थापा, विना मगर, खड्गबहादुर पुन लगायतले अभिनय गरेका छन् ।
जीएम मुभी प्रोडक्सनको ब्यानरमा निर्माण भएको चलचित्रको कथा निर्देशक मगर स्वयंको हो भने पटकथा र संवाद लेखनमा उनलाई सुवास कोइराला र विनोद खतिवडाले साथ दिएका छन् । २८ असार २०८१ मा रिलिज हुने भनिएको चलचित्रको छायांकन सुशन प्रजापतिले गरेका हुन् ।
Discussion about this post