विशेष अनलाइन । आदिवासी लिम्बू समुदायको संस्कार, संस्कृतिको कथामा बनेको नेपाली चलचित्र ‘सुगुप’को विशेष सो इटहरीमा सम्पन्न भएको छ । इटहरीको इलाइट सिनेमा हलमा चलचित्रको विशेष सो गरिएको हो । चलचित्रको यस अघि नै काठमाडौं,धरान,चक्रघटी, पथरी तथा हङकङमा समेत प्रदर्शन भइसकेको छ ।
चलचित्रमा लिम्बू जातिमा प्रसव पिडा अथवा सुत्केरी ब्याथाको कारण ज्युँदो या मृत बच्चा जन्माउँदै गर्दा अथवा सुत्केरी कै कारण रगत बगेर मृत्यु हुने महिलालाई सुगुप भएको भन्ने चलन छ। सुगुप भएर मृत्युवरण गरेकी महिलालाई गरिने मृत्युु संस्कार सामान्य मृत्युमा गरिने संस्कारभन्दा अलग हुन्छ । सुगुप भएको महिलाको मृत्यु संस्कार लाई चलचित्रको मुख्य कथावस्तु बनाइएको छ ।
चलचित्र हेरेका अधिकांश दर्शकले चलचित्रको कथावस्तुलाई रुचाएका छन् । कोशी प्रदेशका सांसद सर्वध्वज साँवाले चलचित्र उत्कृष्ट लागेको बताए । यस्ता चलचित्रहरुलाई सरकारी स्तरबाट नै सहयोग गर्न आवस्यक रहेको सांसद साँवाको भनाई थियो ।
चलचित्रले आर्थिकरुपमा सम्पन्न र विपन्न विचमा हुने विभेद र आइपर्ने समस्याहरुलाई समेत उत्कृष्ट शैलीमा प्रस्तुत गरेको छ ।
चलचित्र ‘सुगुप’मा प्रेम सुब्बा, यासेली योङहाङ, मौसम ईम्बुङ लिम्बू, बबीता नेयोङहाङ, सुम्नीमा खापुङ, डम्बरकुमारी, पयाङगो मेन्याङबो, योमन सोदेम्बा, सागर केरुङ, रुकमा लिम्बू, निता लिम्बू, पन्ना आङबो, एम।के। योङहाङ, तीर्थ मादेम्बा, उदय बेघा, लिला सेत्लिङ माबो, ईन्द्रा पंधाक, युवराज ईश्बो, थानाहाङ तिगेला लगायतका कालाकारहरुको अभिनय रहेको छ।
चलचित्र ‘सुगुप’को निर्देशन लोकेन साँवा लिम्बुले गरेका हुन् । भारतको आसाम, नेपालको ताप्लेजुङ नाल्बू र साँबा याङ्वरक पाँचथर, तेह्रथुम, काठमाडौं, मकवानपुरको कुलेखानी लगायतका स्थलहरुमा छायाङ्कन गरिएको चलचित्रको कथा पनि निर्देशक लिम्बुले नै लेखेका हुन् । हङकङका युवा व्यवसायी रबिन कुमार नाल्बोले निर्माण गरेको ‘सुगुप’को सह(निर्माता दिलमाया लाबुङ नाल्बो र शैलेन्द्र कुमार नाल्बो हुन् ।
Discussion about this post