‘पशुपति प्रसाद’को सिक्वले निर्माण गर्ने दीपेन्द्रको घोषणा

बिशेष अनलाइन । नेपाली दर्शकले निकै रुचाएको चलचित्र ‘पशुपति प्रसाद’को सिक्वेल बन्ने भएको छ । निर्देशक दीपेन्द्र के खनालको निर्देशनमा बनेको ‘पशुपति प्रसाद’ले बक्स अफिसमा राम्रो कमाइ गर्न सफल भएको थियो । हुन त चलचित्रमा प्रस्तुत गरिएको विषयवस्तुका कारण चलचित्र आलोचित समेत नबनेको हैन । तर चलचित्र हेरेका अधिकांश दर्शकले चलचित्रको प्रशंसा गरेका थिए ।

निर्देशक खनालले चलचित्रको सिक्वेल बनाउने विषयमा निर्माण युनिट बिचमा छलफल भइरहेको बताएका छन् । । निर्देशक खनालले भने, ‘यसको सिक्वेल बनाउनुपर्छ भनेर मलाई पनि धेरैले भन्नुभएको छ । दर्शकले अत्याधिक माया गरेको चलचित्रको सिक्वेल बनाउनुपर्छ कि भन्ने मलाई पनि लागेको छ ।’

टिममा छलफल भइरहेको भए पनि तत्काल नै उक्त चलचित्र निर्माण गर्ने योजना नरहेको निर्देशक खनालको भनाइछ । र्‍यापर भिटेनसँगको चलचित्र पश्चात भने ‘पशुपति प्रसाद २’को काम अगाडि बढाउने निर्देशक खनालको भनाइ छ। त्यसो त निर्देशक दीपेन्द्र के खनालले चलचित्र ‘लकडाउन’ को समेत घोषणा गरिसकेका छन् ।

चलचित्र ‘पशुपति प्रसाद’मा खगेन्द्र लामिछाने, विपिन कार्की र वर्षा सिवाकोटीको मुख्य भूमिका रहेको छ । ‘पशुपति प्रसाद २’मा पनि पुरानै कलाकारहरु दोहोरिने सम्भावना रहेको निर्देशक खनालको भनाई छ ।

https://www.youtube.com/watch?v=d46kN206SJQ