विशेष अनलाइन । वि.सं. २०८० सालमा बक्स अफिसमा १७ करोड भन्दा बढीको व्यापार गरेर नयाँ रेकर्ड कायम गरेको सुपरहिट चलचित्र हो ‘जारी’ । बहुप्रतीक्षित सिक्वेल ‘जारी २’ को ट्रेलरले रिलिज भएको दुई दिनमै दश लाख (१० लाख) भ्युज कटाएर ठूलो सफलता हात पारेको छ। उपेन्द्र सुब्बाद्वारा लिखित तथा निर्देशित यो चलचित्रको ट्रेलरले पहिलो भागको कथालाई सुमधुर पारिवारिक सम्बन्धबाट सुरु गर्दै, वैवाहिक जीवनको जटिल र संवेदनशील पाटोतर्फ लगेको छ। ‘जारी’ मा प्रेमका लागि काजीले गरेको सङ्घर्षपछि अब छोरी जन्मिएर स्कुल जाने अवस्थासम्म पुगेको परिवारमा आएको नयाँ मोड नै ‘जारी २’ को केन्द्रबिन्दु बनेको छ।
ट्रेलरमा दयाहाङ राई र मिरुना मगर बीचको प्रेमपूर्ण जीवनमा सानो नोकझोकले कसरी ठूलो पारिवारिक विग्रह निम्त्याउँछ भन्ने मर्मस्पर्शी दृश्यहरू देखाइएको छ। श्रीमान्ले श्रीमतीमाथि रिस पोखेपछि माइती लिन आउने र समाज बसेर कुरा मिलाउने अवस्थाले लिम्बू समुदायको सामाजिक परम्परालाई नजिकबाट चित्रण गरेको छ। विशेषगरी, माइतीले दिएको च्याब्रुङ च्यातिएर दीनदशा सुरु हुनु र माइत गएपछि छोरीलाई घरमै छोडेर जानुपर्दाको पीडा दयाहाङको अनुहारमा देखिएको पश्चात्तापको भारी ले दर्शकलाई भावुक बनाउँछ। ‘जारी २’ को ट्यागलाइन ‘सङ अफ च्याब्रुङ’ ले पनि लिम्बू संस्कृतिको महत्त्वपूर्ण प्रतीक च्याब्रुङलाई कथाको मूलधारमा राखेको प्रस्ट हुन्छ।
चलचित्रमा विजय बरालको पात्र (मङ्गल सिंह) को कथा पनि निकै त्रासदपूर्ण रहेको ट्रेलरले देखाएको छ। विजयकी श्रीमती माइत गएपछि फर्कन नमान्दा, ससुरालीले ‘जिउको बदला जिउ’ भन्दै आँखा नभएकी नयाँ दुलही अन्माइदिने दृश्यले विजयको जीवनमा आएको ठूलो उथलपुथललाई चित्रण गरेको छ। यो त्रासदीपूर्ण अवस्थासँगै माइत बसेकी मिरुनालाई ‘लाहुरे’ सँग नयाँ वैवाहिक सम्बन्धका लागि प्रस्ताव आउँछ, जसमा ‘जारी तिर्न सक्ने हो भने बाटो खुला’ रहने भनिएको छ। ट्रेलरले ‘लाहुरे’ को परिचयलाई भने सस्पेन्समा राखेको छ, जसले कथामा नयाँ र शक्तिशाली ट्विस्ट ल्याउने अनुमान गर्न सकिन्छ। उता, मेलामा दयाहाङलाई पनि अर्की सोल्टिनीसँग देखिनुले पुनर्मिलनको बाटो झन् कठिन बनेको संकेत गर्छ।
प्रेम, वियोग र प्रदर्शनको तयारी: रामबाबु गुरुङ, मधु मिजार र जीवन गुरुङले निर्माण गरेको यो चलचित्रमा दयाहाङ राई, मिरुना मगर र विजय बरालको मुख्य भूमिका रहेको छ। लिम्बू संस्कृतिभित्र रहेर श्रीमान्–श्रीमतीबीचको प्रेम, खुसी, नोकझोक, इज्जतको हुर्मत, वियोग र अन्ततः पुनर्मिलनको पखाई जस्ता मानवीय भावनात्मक पक्षहरूको उतारचढावलाई ट्रेलरमा सशक्त रूपमा प्रस्तुत गरिएको छ। यसैकारण, ‘जारी २’ ले नेपाली चलचित्र उद्योगमा पहिलो भागको जस्तै आक्रामक व्यापार गर्ने अपेक्षा गरिएको छ। प्रतिक्षित चलचित्र ‘जारी २’ देशभर कात्तिक २१ गते देखि प्रदर्शनमा आउँदैछ।
Discussion about this post