विशेष अनलाइन । इटहरीमा ‘महाकमेडी विथ महाजात्रा’ कार्यक्रम हुने भएको छ । कार्यक्रमका निर्देशक विशाल भण्डारी तथा कमेडियनद्वय सुमन कार्की र कैलाश कार्कीको उपस्थितिमा आयोजित पत्रकार भेटघाटका क्रममा कार्यक्रमका विषयमा जानकारी दिइयो । इटहरी चोकबाट करिब २ किलोमिटर उत्तरमा रहेको इम्पेरियल लाउन्ज एण्ड बारको शभाहलमा आउँदो चैत्र १ गते बेलुका कार्यक्रम गरिने तय भएको निर्देशक भण्डारीले जानकारी दिए । चैत्र ९ गतेबाट प्रदर्शनमा आउन लागेको नेपाली चलचित्र ‘महाजात्रा’ र ‘कमेडी नाइट विथ च्याम्यियन’ मिलेर ‘महाकमेडी विथ महाजात्रा’ कार्यक्रम आयोजना गर्न लागिएको हो ।
देश भरिका विभिन्न सहरहरूमा २ चरणमा गरी आयोजना गर्ने भनिएको कार्यक्रमको पहिलो चरण पुरा भइसकेको छ । पहिलो चरणमा पोखरा, बुटवल र धनगढीमा कार्यक्रम सम्पन्न भइसकेको छ । अब दोस्रो चरण अन्तर्गत बिर्तामोड, इटहरी,हेटौडा र नारायणगढमा कार्यक्रम गर्ने तयारी गरिएको निर्देशक भण्डारीले जानकारी दिए । हास्यव्यङ्ग्य कार्यक्रम प्रत्यक्ष हेर्न चाहने दर्शकसँग साक्षात्कार गर्न तथा कार्यक्रमलाई दर्शकले कत्तिको रुचाउनु भएको छ भनेर नजिकबाट नियाल्नका लागि पनि कार्यक्रमको आयोजना गरिएको निर्देशक भण्डारीको भनाई छ ।
कार्यक्रममा स्थानीय स्तरका समसामयिक विषयहरूको अध्ययन गरी सोहीअनुसारको प्रस्तुति दिइने कमेडियन सुमन कार्कीले उल्लेख गरे । आफू पनि पूर्वेली भएका कारण पूर्वमा नै आएर प्रस्तुति दिन उत्साहित रहेको अर्का कमेडियन कैलाश कार्कीले बताए ।
कार्यक्रममा चलचित्र ‘महाजात्रा’को तर्फबाट वरिष्ठ हास्य कलाकार हरिवंश आचार्यका साथमा कलाकारहरू विपिन कार्की, रवीन्द्रसिंह बानियाँ, रवीन्द्र झा, राजाराम पौडेल, अभिनेत्री वर्षा राउत लगायतको सहभागिता रहने छ । यता ‘कमेडी नाइट विथ च्याम्यियन’का तर्फबाट अभिनेत्री तथा निर्देशक दीपाश्री निरौलासँगै कमेडियन सुमन कार्की, मेक्सम गौडेल, कैलाश कार्की, सजन श्रेष्ठ, प्रभात लामा, सन्तोष थापा लगायतको प्रस्तुति रहने छ ।
Discussion about this post