जातीय विभेदको कथामा छोटो चलचित्र ‘कोमा एक चिहान’ निर्माण हुने 

विशेष अनलाइन । छोटो चलचित्र ‘कोमा एक चिहान’ निर्माण हुने भएको छ । महेश घिमिरे र सुरज पोखरेलले निर्माण गर्न लागेको छोटो चलचित्र ‘कोमा एक चिहान’को हाल प्रि पोडक्शनको काम भइरहेको छ । ‘कोमा एक चिहान’को आउँदो चैत्र २ र ३ गते छायाङ्कन गर्ने तयारी रहेको निर्माण युनिटले जानकारी दिएको छ । चलचित्रको कथा भीम पाण्डेले लेखेका हुन् भने लेखक पाण्डेले नै चलचित्रको निर्देशन गर्न लागेका हुन् ।

चलचित्रले नेपाली परिवेशको कथा प्रस्तुत गर्ने छ । जातीय विभेदका कारण प्रेम सफल नहुने भए पछि आफ्नो जीवन नै समाप्त गर्न सम्म पछि नपर्ने प्रेमिल जोडीको कथामा चलचित्र निर्माण गर्न लागिएको निर्देशक भीम पाण्डेले जानकारी दिए ।

‘कोमा एक चिहान’मा रश्मी थापा, विजय रोय, गोपाल कुती, नबु न्यौपाने लगायतका कलाकारहरूको अभिनय रहने छ । चलचित्रलाई जोसन थापाले खिच्ने छन् । चलचित्रलाई देश तथा विदेशका विभिन्न फेस्टिबलहरुमा पठाइने निर्देशक पाण्डेले जानकारी दिएका छन् ।