घर घर “प्रेम गीत ३”को प्रचार

बिशेष अनलाइन । बर्षकै बहुप्रतिक्षित चलचित्र “प्रेम गीत ३” को प्रचारप्रसार प्रारम्भ गरिएको छ । नयाँ प्रचार शैलिका कारण चलचित्रले फेरी एक पटक चर्चा बटुलेको छ । “प्रेम गीत ३”ले चलचित्र निर्माण घोषणा देखि नै दर्शकमाझ छुट्टै कौतुहलता छाड्दै आएको छ । यसभन्दा अघिको सिक्वेलले सफलता प्राप्त गरेपछि दोस्रो सिक्वेलका रुपमा “प्रेम गीत ३” निर्माण भएको हो ।

२०० बर्ष पुरानो कथामा निर्माण गरेको चलचित्र ७ असोजबाट प्रदर्शनमा आउदै छ । चलचित्र प्रदर्शनमा आउनु भन्दा २ महिना अघिबाट चलचित्रको प्रचार सुरु गरिएको हो । शनिबार गोगंबुस्थित लोत्से मलमा चलचित्रका मुख्य कलाकारसहितको भव्य ब्यानर राखेर चलचित्रको प्रचार सुरु गरिएको छ ।

दुईजना निर्देशकले निर्देशन गरेको चलचित्र “प्रेम गीत ३” हिन्दी भाषामा पनि डब गरिएको छ । नेपाली र हिन्दी भाषामा एकैसाथ प्रदर्शन गरिने निर्माण युनिटले बताएको छ । भारतमा भने चलचित्र ‘विश्वजितम’ का नामबाट प्रदर्शन हुने छ । शहर शहरमा पात्र प्रतिबिम्बको घर आउदैछ भन्ने मुल नाराका साथ चलचित्र युनिट प्रचार प्रसारमा होमिएको छ । घर घरबाट चलचित्रको प्रोमोसन गर्ने उद्देश्यले दैनिक मानिसहरुको चहलपहल हुने शपिङ कम्प्लेक्स , मुख्य बजार चोकका घर, चलचित्र घर लगायतका स्थानमा ठुल ठुला ब्यानर र होर्डिङ्ग बोर्ड राख्न सुरु गरेको छ ।
उक्त कार्य काठमाण्डौमा मात्र नभइ काठमाण्डौ भन्दा बाहिरका मुख्य शहरहरुमा पनि होर्डिङ्ग बोर्ड र ब्यानर हरु राख्ने योजना रहेको निर्माता तथा चलचित्रका निर्देशक सन्तोष सेनले जानकारी दिए ।
चलचित्र “प्रेम गीत ३” मा अभिनेता प्रदिप खड्कालाइ नव नायिका कृष्टिना गुरुङले साथ दिएकी छन् । चलचित्रमा सुनिल थापा, शिव श्रेष्ठ, संतोष सेन, माओत्से गुरुङ, प्रेम पुरी, नवनायक मनिष रावत, अनुभव रेग्मी, सुजल बस्नेत, सम्बृद्धि शाही ठकुरी, योगीसा खत्री, लक्ष्मी बर्देवा, क्रिजल गौतम लगायतका कलाकारको मुख्य भूमीका रहेको छ ।