विशेष अनलाइन । यतिबेला बालबालिकाहरुको प्रतियोगिता भ्वाइस अफ किड्स चलिरहेको छ । यसैबिच ‘द भ्वाइस अफ नेपाल’ सिजन ६ को घोषणा गरिएको छ । हिमालय टेलिभिजनले सोमबार नयाँ सिजनको डिजिटल अडिसन खुला भएको जानकारी दिएको छ ।
डिजिटल अडिसनमा सहभागी हुन परिचय खुलाएर गीत गाई भिडियो रेकर्ड गर्नु पर्ने छ । रेकर्ड गरिएको भिडियो हिमालय टिभी एपमा पठाउनु पर्ने छ । त्यसका साथै परिचय खुलाएर ९८१०१२४११० मा ह्वाट्स एपमा समेत भिडियो पठाउन सकिने बताइएको छ ।
इच्छुकले १५ दिनभित्र आवेदन दिन सक्ने शोका निर्देशक लक्ष्मण पौडेलले जानकारी दिए । १६ देखि ४० वर्ष उमेर समूहका नेपाली गीत गाउन सक्ने जोसुकैले सहभागी हुन पाइने जनाइएको छ ।
निर्देशक पौडेलका अनुसार किड्स संस्करण सकिने बित्तिकै भ्वाइस अफ नेपालको ब्लाइन्ड अडिसन सुरु गर्ने तयारी छ । टेलिभिजनको गायन रियालिटी शो द भ्वाइस अफ नेपाल युवापुस्तामाझ लोकप्रिय साङ्गीतिक प्लेटफर्म हो ।
अन्तर्राष्ट्रिय टेलिभिजन गायनको वास्तविकता शृङ्खला द भ्वाइस अफ नेपाल एक नेपाली चर्चित कार्यक्रम हो । पहिलो सिजनमा ४ जना प्रशिक्षकहरूमा दीप श्रेष्ठ, प्रमोद खरेल, सनुप पौडेल र अभय सुब्बा रहेका थिए। पहिलो संस्करण भने समूह दीपबाट सीडी विजय अधिकारीले जितेका थिए।
यस्तै दोस्रो सिजनमा दीप श्रेष्ठ र प्रमोद खरेल दोहोरिएका थिए भने सनुप पौडेल र अभय सुब्बाको स्थानमा राजु लामा र आस्था राउत भित्रिएका थिए । दोस्रो संस्करणको उपाधि भने समूह प्रमोदबाट राम लिम्बुले जित्न सफल भएका थिए ।
तेस्रो संस्करणको गायन रियालिटी शो द भ्वाइस अफ नेपालको उपाधि किरण गजमेरले जितेका उनले समूह प्रमोदमा रहँदै यो उपाधि हात पार्न सफल भएका थिए । एकबाट लगातार कोचका रुपमा दोहोरिँदै आएका प्रमोद खरेलको समूहले लगातार दोस्रो पटक यो उपाधि चुम्न सफल भएको थियो । तेस्रो संस्करणमा प्रमोद खरेलसँगै, दीप श्रेष्ठ, राजु लामा र तृष्णा गुरुङ कोचका रूपमा रहेका थिए । सबै कोच अघिल्लो सिजनकै दोहोरिएकोमा आस्था राउतलाई भने तृष्णा गुरुङले रिप्लेस गरेकी थिइन् ।
‘द भ्वाइस अफ नेपाल’को चौथो सिजनको उपाधि राजु लामा समूहबाट करण राईले जित्न सफल भएका थिए । चौथो सिजनमा पनि २ जना प्रशिक्षक परिवर्तन हुँदै राजेश पायल राई र प्रविशा अधिकारी भित्रिएका थिए भने प्रमोद खरेल र राजु लामाले निरन्तरता पाएका थिए ।
यता द भ्वाइस अफ नेपाल सिजन ५ मा गायक प्रमोद खरेल र राजेश पायल राईले निरन्तरता पाएका थिए भने उदय सोताङ र मिलन नेवार भित्रिएका थिए । द भ्वाइस अफ नेपाल सिजन ५ को उपाधि मिलन नेवार समूहबाट विनोद राईले जित्न सफल भएका थिए ।
छैटौँ सिजनबारे भने विस्तृत खुलाइएको छैन । कुन कोचले निरन्तरता पाउनेछन् भन्ने पनि उल्लेख गरिएको छैन । अघिल्ला सिजनमा निरन्तरता पाइरहेका प्रमोद खरेलले निरन्तरता पाउँछन् वा पाउँदैनन्, यो धेरैको चासोको विषय हुनेछ ।
यस कार्यक्रमलाई निर्देशन भने, पहिलाका नेपाल आइडलका प्रथम संस्करणका निर्देशक लक्ष्मण पौडेलले गरिरहेका छन् ।
Discussion about this post