विशेष अनलाइन । ज्योतिष तथा वास्तुशास्त्रको माध्यमबाट सरकारी संरचनामा सकारात्मक ऊर्जा प्रवाह गर्ने उद्देश्यले बुटवलमा पहिलोपटक सार्वजनिक भवनहरूको वास्तु परीक्षण गरिएको छ। ज्योतिष तथा वास्तुविद् प्रेमबहादुर मल्ल ‘हाकिम सम्राट’ ले देवदह नगरपालिकाका विभिन्न सरकारी तथा सार्वजनिक भवनहरूको वास्तुशास्त्र अनुसार निरीक्षण गरी सुधारका उपायहरू सुझाव दिनुभएको हो। पुस ५ देखि ८ गतेसम्म बुटवलमा आयोजित ज्योतिष परामर्श कार्यक्रमको सिलसिलामा उहाँले यी सरकारी संरचनाहरूको अध्ययन गर्नुभएको हो।
वास्तुविद् मल्लले देवदह नगरपालिका र स्थानीय वडा कार्यालयसमक्ष सरकारी भवनहरूको वास्तु अवस्था बुझ्ने प्रस्ताव राख्नुभएको थियो, जसलाई स्थानीय तहले सकारात्मक रूपमा स्वीकार गरेका थिए। सोही क्रममा उहाँले देवदह नगर अस्पतालको निरीक्षण गरी त्यहाँको ऊर्जा प्रवाह, संरचनागत प्रभाव र बिरामी एवं स्वास्थ्यकर्मीका लागि अनुकूल हुने सुधारका उपायहरू सुझाउनुभयो। सरकारी निकायका भवनहरूमा यसरी औपचारिक रूपमा वास्तु परीक्षण गरिएको यो सम्भवतः पहिलो घटना हो।
शिक्षा क्षेत्रमा सकारात्मक परिवर्तन ल्याउने उद्देश्यले मल्लले देवदहकै केरवानी माध्यमिक विद्यालयको समेत निरीक्षण गर्नुभयो। विद्यालयका प्रधानाध्यापक निर्मल ढुंगानाका अनुसार मल्लले कक्षाकोठाको दिशा, विद्यार्थीको बसाइ व्यवस्था र ऊर्जात्मक सन्तुलनको अध्ययन गरी शैक्षिक क्षमता अभिवृद्धि गर्ने विषयमा प्रशासनसँग विस्तृत छलफल गर्नुभएको थियो। वास्तु मिलाउँदा विद्यार्थीको एकाग्रता र अध्ययन रुचिमा सुधार आउने विश्वास उहाँले व्यक्त गर्नुभयो।
यसैगरी, देवदह नगरपालिका वडा नम्बर ५ को कार्यालय र नगरपालिकाको मुख्य प्रशासनिक भवनको समेत वास्तु परीक्षण गरिएको छ। वडा अध्यक्ष गणेश डुम्रेका अनुसार भवनमा रहेका दिशागत त्रुटि र ऊर्जा असन्तुलन पहिचान गरी सुधारका विधिहरू जानकारी गराइएको छ। नगरपालिकाले यी प्राविधिक र शास्त्रीय सुझावहरूलाई आगामी दिनमा कार्यान्वयन गर्ने प्रतिबद्धता जनाएको छ। सरकारी कामकाजमा हुने ढिलासुस्ती र नकारात्मक ऊर्जा न्यूनीकरणका लागि यो प्रयास प्रभावकारी हुने देखिएको छ।
सामाजिक उत्तरदायित्वलाई आत्मसात गर्दै ज्योतिष प्रेमबहादुर मल्लले यी सबै सेवाहरू पूर्ण रूपमा नि:शुल्क प्रदान गर्नुभएको हो। “साना–साना सुधारबाटै नगर र देश निर्माणमा सहयोग पुग्छ” भन्ने मान्यता राख्ने मल्लले आगामी दिनमा पनि यस्ता सामाजिक कार्यलाई निरन्तरता दिने बताउनुभएको छ। उहाँको यो नि:स्वार्थ पहललाई स्थानीय जनप्रतिनिधि र बुद्धिजिवीहरूले उच्च प्रशंसा गरेका छन्।
Discussion about this post