विशेष अनलाइन । इटहरी–२० तरहरामा अवस्थित पूर्वाञ्चल स्कुल तथा कलेजले भव्य स्वागत तथा दिक्षान्त समारोहको आयोजना गरेको छ । कलेजले कक्षा ११ र विविएस प्रथम वर्षमा भर्ना भएका नयाँ विद्यार्थीलाई औपचारिक स्वागत गर्दै, राष्ट्रिय परीक्षामा सफल विद्यार्थीलाई दिक्षान्त प्रमाणपत्र प्रदान गरेको हो ।
कलेज व्यवस्थापन समितिका अध्यक्ष भोला काजी बस्नेतको अध्यक्षतामा सम्पन्न समारोहलाई सहायक प्राचार्य विशाल कार्की, शिक्षक गोविन्द घिमिरे र प्राचार्य सौधन राईले सम्बोधन गरेका थिए । वक्ताहरूले कलेजको विगतका उपलब्धि, गुणस्तरीय शिक्षाप्रति निरन्तर गरिएको प्रयास, विद्यार्थीबीच कायम हुनुपर्ने आपसी सद्भाव र आगामी दिनमा अझ प्रभावकारी रुपमा अघि बढ्ने प्रतिबद्धता व्यक्त गरेका थिए ।
सोही अवसरमा विद्यार्थीहरूले प्रस्तुत गरेका गीत, नृत्य र कविताले कार्यक्रमलाई अझ रसमय बनाएको थियो । पहिलो पटक आयोजना गरिएको दिक्षान्त समारोहमा विद्यार्थी, अभिभावक र स्थानीय समुदायको उल्लेखनीय सहभागिता रहेको कलेज को–अर्डिनेटर ईश्वर राईले बताए ।
कलेज परिवारले यसलाई आफ्नो शैक्षिक यात्राको नयाँ आयामका रूपमा व्याख्या गर्दै भविष्यमा अझ व्यापक र गुणस्तरीय शैक्षिक कार्यक्रम ल्याउने घोषणा गरेको छ ।
Discussion about this post