फूलपातीमा ‘अभिमन्यु : च्याप्टर १’ को भव्य प्रदर्शनको तयारी, निर्माण पक्ष उत्साहित

विशेष अनलाइन । चलचित्र ‘अभिमन्यु : च्याप्टर १’ फूलपातीको  अवसर पारेर असोज १३ गतेदेखि प्रदर्शनमा आउने पक्का भएको छ । यसअघि भदौ २७ गतेलाई प्रदर्शन मिति तोकिएको भए पनि विशेष परिस्थितिका कारण सारिएको चलचित्र अब भने दर्शकमाझ आउन पूर्ण रूपमा तयार भएको निर्माण कम्पनी सेभेन सिज नेपालले जनाएको छ ।

देशमा आएको सकारात्मक परिवर्तनलाई आत्मसात् गर्दै चलचित्र उद्योगलाई थप चलायमान बनाउने उद्देश्यका साथ ‘अभिमन्यु : च्याप्टर १’ को नयाँ प्रदर्शन मिति घोषणा गरिएको निर्माण पक्षको भनाइ छ । निर्माता विनोद पौडेलका अनुसार प्रचारप्रसारमा भइसकेको खर्च र लामो समय चलचित्रलाई होल्डमा राख्नुभन्दा उपयुक्त साइत हेरेर प्रदर्शनमा ल्याउनु नै उत्तम विकल्प देखिएको हो ।

“हामीले सोचेरै फूलपातीमा आउने निर्णय गरेका हौँ,” निर्माता पौडेलले भने, “कसैसँग जुध्ने हाम्रो उद्देश्य होइन । परिस्थितिले हामीलाई असोज १३ मा ल्याइपुर्याएको हो र यो मिति सबैको सल्लाहमा तय गरिएको हो ।”

सुशान्त गौतम निर्देशित यस चलचित्रमा कामेश्वर चौरसिया, सरिता गिरी, किरण श्रेष्ठ, लक्ष्मी बर्देवा, गौमाया गुरुङ, प्रकाश दाहाल, शिशिर वाङ्देल लगायतका कलाकारहरूको दमदार अभिनय देख्न पाइनेछ । मुकेश खनालले लेखेको यस चलचित्रलाई विनोद पौडेल र गुञ्जन गिरीले निर्माण गरेका हुन् । रमेश चौलागाईं र हरि श्रेष्ठ सह–निर्माता रहेको यस चलचित्रमा विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठ कार्यकारी निर्माताका रूपमा रहेका छन् ।