विशेष अनलाइन । आगामी फागुन १ गते (महाशिवरात्रि) बाट प्रदर्शन हुन लागेको नयाँ नेपाली चलचित्र ‘शिवांश’ को प्रचार सुरु भएको छ। केही दिनअघि ट्रेलरको छोटो रुप (टिजर) सार्वजनिक गरेर चर्चा कमाएको यस चलचित्रले अहिले आफ्नो पहिलो गीत ‘बैंश भुसुक्कै’ सार्वजनिक गरेको हो।
यो गीतमा नेपालका प्रख्यात गायक राजनराज शिवाकोटी र गायिका समीक्षा अधिकारीको स्वर रहेको छ। गाउँले परिवेशमा गाइने मौलिक र रमाइलो भाकाको यो गीतलाई राजनराज शिवाकोटी आफैँले संगीत दिएका हुन्। गीतका शब्दहरू सजिला र मन छुने खालका छन्।
गीतको भिडियोमा फिल्मका मुख्य कलाकारहरू तेज गिरी, विमला लिम्बू र बारत लिम्बूले अभिनय गरेका छन्। विक्रम चौहानले नृत्य निर्देशन (कोरियोग्राफी) गरेको यस भिडियोमा प्रेमी-प्रेमिका बीचको प्रेम र आकर्षणलाई निकै सुन्दर ढंगले देखाइएको छ।
चलचित्रलाई सन्तोष कुमार आत्रेयले निर्देशन गरेका हुन्। उनले यही चलचित्रबाट निर्देशनमा पाइला राखेका हुन्। चलचित्रको कथा अञ्जान केसीले लेखेका हुन् भने बारत लिम्बूको पटकथा रहेको छ।
अञ्जान सिनेमा प्रोडक्सनको ब्यानरमा बनेको यो चलचित्र फागुन १ गतेदेखि देशभरका हलहरूमा लाग्नेछ।
Discussion about this post