विशेष अनलाइन । नयाँ नेपाली चलचित्र ‘बिगुल’ को ‘जनताको आवाज’ बोलको गीत ओएसआर डिजिटलको युट्युब च्यानलमा सार्वजनिक भएको छ । माघ ९ गतेबाट प्रदर्शन हुने तयारीमा रहेको यस चलचित्रले गीत मार्फत राष्ट्रप्रेम र एकताको आह्वान गरेको छ। यस गीतलाई चलचित्रको मुख्य आधार स्तम्भका रूपमा हेरिएको छ, जसले नागरिकका भोगाइ र देशप्रतिको आशालाई समेटेको छ।
म्याग्नोलिया ग्रुपको ब्यानरमा बनेको सार्वजानिक गितमा उनीहरूले देश बनाउनका लागि सबै नेपालीहरू एकजुट हुनुपर्ने र ‘हामीले नगरे कसले गर्ने’ भन्ने भावलाई सशक्त रूपमा प्रस्तुत गरेका छन्। गीतमा नेपाली समाजको यथार्थ चित्रण गर्दै राष्ट्रियताको भावनालाई जागृत गराउने प्रयास गरिएको छ।
रमेश कोइरालाको कथा ,निर्माण तथा निर्देशन रहेको चलचित्रमा बेनिशा हमाल, नरेन खड्का, रमेश बुढाथोकी, नीर शाह, सरोज खनाल, हेमन्त बुढाथोकी, शिशिर वाङ्देल, विनोद न्यौपाने, जेएन घिमिरे, गीता अधिकारी, मिरा पण्डित, मानश्री शर्मालगायतका कलाकारहरुको अभिनय रहेको छ ।
महेश कोइराला र सूर्यकान्त कोइराला सहनिर्माता रहेको चलचित्रको पटकथा र संवाद प्रदीप भारद्वाज र मौनता श्रेष्ठले लेखेका हुन् । शिव ढकालले छायाङ्कन, कमल राई र कविराज गहतराजले नृत्य निर्देशन, एनवी महर्जनले द्वन्द्व निर्देशन गरेका छन् ।
विश्वप्रकाश शर्मा, अर्जुन पोखरेल र मनोज चौलागाईंको संगीत रहेको चलचित्रको सम्पादन तारा थापा ‘किम्भे’ ले गरेका हुन् । चलचित्र राजधानीभित्र काफिया फिल्म्स् र मोफसलमा श्री ब्याङ्केट्स इन्टरटेन्मेन्टले वितरण गर्दैछ ।
Discussion about this post