विशेष अनलाइन । अन्तर्राष्ट्रिय चलचित्र महोत्सवमा नेपाली चलचित्रको उपस्थिति र सम्भावनाबारे केन्द्रित अन्तरक्रिया कार्यक्रम सम्पन्न भएको छ। चलचित्रकर्मी महासंघ कोशी प्रदेशको आयोजनामा तथा महासंघका अध्यक्ष अरुण कुमार प्रधानको संयोजकत्वमा आयोजित उक्त कार्यक्रममा नेपाली चलचित्रलाई अन्तर्राष्ट्रिय मञ्चसम्म कसरी पुर्याउने भन्ने विषयमा गहन छलफल गरिएको थियो।
कार्यक्रमका मुख्य वक्ता अन्तर्राष्ट्रिय चलचित्र महोत्सवका अध्यक्ष तथा चलचित्र निर्देशक केपी पाठकले नेपाली चलचित्रको विषयवस्तु, प्रस्तुति र प्राविधिक पक्ष अन्तर्राष्ट्रिय स्तरसँग प्रतिस्पर्धा गर्न सक्ने अवस्थामा पुग्दै गएको बताए।
उनले भने, “हामीसँग कथा छन्, मौलिकता छ। अब आवश्यक भनेको अन्तर्राष्ट्रिय महोत्सवको मापदण्ड बुझेर त्यसअनुसार चलचित्र प्रस्तुत गर्नु हो। सही प्लेटफर्म र रणनीति अपनाउन सके नेपाली सिनेमा विश्व बजारमा स्थापित हुन सक्छ।”
अन्तरक्रियामा बलिउडका विभिन्न चलचित्रमा काम गरिसकेका तथा दर्जनौं नेपाली चलचित्र निर्देशन र अभिनय गरिसकेका कलाकार तथा निर्देशक बन्नी प्रधानले अनुभव साट्दै अन्तर्राष्ट्रिय महोत्सवमा चलचित्र पठाउँदा अनुशासन, समय व्यवस्थापन र प्रस्तुति शैली महत्वपूर्ण हुने बताए। उनले भने, “महोत्सवमा फिल्म पठाउनु मात्रै ठूलो कुरा होइन, त्यहाँ फिल्म कसरी प्रस्तुत गरिन्छ, निर्देशक र टोलीले आफ्नो कामलाई कसरी व्याख्या गर्छन् भन्ने कुराले पनि चलचित्रको भविष्य तय गर्छ।”
कार्यक्रमका संयोजक तथा चलचित्रकर्मी महासंघ कोशी प्रदेशका अध्यक्ष अरुण कुमार प्रधानले कोशी प्रदेशका चलचित्रकर्मीहरूलाई अन्तर्राष्ट्रिय स्तरमा पुर्याउने उद्देश्यले यस्तो कार्यक्रम आयोजना गरिएको बताए। उनले भने, “प्रदेशमै रहेर पनि अन्तर्राष्ट्रिय महोत्सवसम्म पुग्ने सम्भावना छ भन्ने विश्वास दिलाउनु हाम्रो उद्देश्य हो। यस किसिमका अन्तरक्रियाले स्थानीय चलचित्रकर्मीलाई आत्मविश्वास र स्पष्ट मार्गदर्शन दिन्छ।”
अन्तरक्रिया कार्यक्रममा सहभागी स्थानीय चलचित्रकर्मीहरूले आफ्ना चलचित्र अन्तर्राष्ट्रिय महोत्सवमा प्रदर्शन गर्ने प्रक्रियाबारे चासो राख्दै प्रश्न गरेका थिए। वक्ताहरूले महोत्सव छनोट प्रक्रिया, फिल्म सबमिसन, नेटवर्किङ र मार्केटिङका पक्षमा व्यवहारिक सुझाव दिएका थिए।
कार्यक्रमले कोशी प्रदेशका चलचित्रकर्मीहरूलाई अन्तर्राष्ट्रिय चलचित्र महोत्सवप्रति थप उत्साहित बनाएको आयोजकले जनाएको छ।
Discussion about this post