विशेष अनलाइन । बहुप्रतिक्षित नेपाली चलचित्र ‘लडाइँ पहिचानको’ को ट्रेलर सार्वजनिक भएको छ। ट्रेलरले तत्कालीन प्रदेश नम्बर १ (हाल कोशी प्रदेश) मा पहिचानको माग गर्दै भएको ऐतिहासिक र संवेदनशील आन्दोलनको कथालाई गहन रूपमा प्रस्तुत गरेको छ।
सार्वजनिक ट्रेलरले प्रदेशको नाम ‘किरात लिम्बुवान प्रदेश’ राखिनुपर्छ भन्ने आन्दोलनको मागलाई स्पष्ट रूपमा देखाएको छ। यसले पहिचानको लडाइँलाई कुनै एक व्यक्तिको मात्र नभई सम्पूर्ण जनजाति समुदायको अस्तित्व र आत्मसम्मान सँग जोडिएको विषयका रूपमा प्रस्तुत गरेको छ। आन्दोलनकारीहरूले सडकमा उत्रिएर गरेको सङ्घर्षका दृश्याङ्कनहरू निकै सशक्त छन्।
ट्रेलरमा नाम ‘कोशी’ घोषणा भएपछिको विद्रोह मुख्य द्वन्द्वको रूपमा देखाइएको छ। नामकरणपछि आन्दोलनले कसरी आक्रामक र कठोर रूप लियो भन्ने कुरा ट्रेलरका दृश्यहरूमा स्पष्ट झल्कन्छ। यसले राज्यपक्ष र आन्दोलनकारीबीचको द्वन्द्व, तनावपूर्ण माहोल र न्यायका लागि गरिएका बलिदानहरू लाई पनि मर्मस्पर्शी ढङ्गले समेटेको छ।
भिम लामाको लेखन तथा निर्देशनमा बनेको चलचित्र ‘लडाई पहिचानको’ आगामी मङ्सिर ५ गतेबाट अलनेपाल प्रदर्शनमा आउने भएको छ। सामाजिक पहिचान, संघर्ष र आत्म–स्वाभिमानको कथा बोकेको यस चलचित्रमा नेपाली समाजको विविधता र मनोभावनालाई कलात्मक रूपमा प्रस्तुत गरिएको छ।
चलचित्रमा प्रशान्त तामाङ, करिश्मा मानन्धर, धिरेन शाक्य, जेनी घिसिङ, प्रेम सुब्बा, राजेन्द्र खड्गी, सुरवीर पण्डित, किश्वर सम्बाहाम्फे, रोशन शर्मा, सुभाष योञ्जन, पारसुराम चौधरी, शर्मिला राई, अरुण कुमार प्रधान, दिलु सुब्बा, रामजी बिष्ट, दिनेश कोइराला, कविता राई, त्सेरिङ लामा, नविन म्याङ्बो, दाम्बर कुमारी लिम्बु, पाबी टेम्बे, वर्षा राजभण्डारी तामाङ र सुदीप लिम्बु लगायतका कलाकारहरूको अभिनय रहेको छ।
चलचित्रका निर्माता भिम लामा, रामजी बिष्ट, दिलु सुब्बा र उमेश तामाङ हुन्। कथा र स्क्रिनप्ले भिम लामा, सरोज केसी र रमेश डी. कौशिकले लेखेका हुन्। चलचित्रको सिनेमाटोग्राफी मदन कास्यप घिमिरेले गरेका छन् भने सम्पादन रमेश डी. कौशिकले सम्हालेका छन्। एक्सनमा देवकुमार महर्जनको संयोजन रहेको चलचित्रमा कोरियोग्राफी मणीकुमार लिम्बू र सानुराजा थेगिमले गरेका छन्।
Discussion about this post