विशेष अनलाइन । सोमबार प्रदर्शनमा रहेको चलचित्र ‘बलिदान’ हेरेपछि वरिष्ठ अभिनेता तथा क्याप्टेन विजय लामा निकै प्रभावित भएका छन्। पत्रकारहरूसँग प्रतिक्रिया दिँदै उनले अहिलेको नेपाली चलचित्रको स्तर देखेर आफू निकै खुसी भएको बताए।
चलचित्र हेरेपछि लामाले भने, “यो ‘बलिदान’ मा मैले ठूलो बलिदान नै पाएँ। यो चलचित्रसँग आबद्ध सबैको ठूलो योगदान र फरक स्तरको काम देखेँ। नेपाली चलचित्रको स्तर बढ्दै गएको छ।”
अभिनेता लामाले चलचित्रका निर्देशक सन्तोष सेन को कामको खुलेर प्रशंसा गरे। उनले आफ्नो अभिनयको सुरुवाती दिनहरूलाई सम्झँदै भने, “यदि मेरो समयमा सन्तोष सेनजस्तो निर्माता-निर्देशक पाएको भए, म पनि समीर भट्टजस्तै एक्सन हिरो हुने थिएँ।”
उनले चलचित्रका मुख्य कलाकार समीर भट्ट को अभिनयलाई विशेष रूपमा तारिफ गर्दै भने, “बिराज (भट्ट) को समयमा बिराजको आधिपत्य थियो, अब समीरको पालो हो।” उनले समीरलाई नेपाली एक्सन सिनेमाको भविष्यको रूपमा हेरेका छन्।
चलचित्रकी अर्की मुख्य कलाकार ऋचा शर्मा ले ‘बलिदान’ ले दर्शकबाट पाइरहेको मायाप्रति आफू निकै भाव विह्वल भएको बताइन्। उनले समीर भट्टकी आमाको भूमिकामा गरेको अभिनयले दर्शकसँग गहिरो भावनात्मक सम्बन्ध स्थापित गर्न सफल भएकोमा खुसी व्यक्त गरिन्।
आमा–छोराबीचको प्रेम र त्यागमा आधारित यो चलचित्र सन्तोष सेन ले निर्देशन गरेका हुन्। ‘आशुसेन फिल्म प्रोडक्सन’ को ब्यानरमा बनेको यो चलचित्रमा समीर भट्ट र ऋचा शर्मा बाहेक सौगात मल्ल, अर्पण थापा, कविता राय, हेमन्त बुढाथोकी, प्रेम पुरी लगायतका कलाकारहरूको अभिनय रहेको छ। चलचित्रका निर्माता पवन ब्राडफोर्ड बिस्ट र कार्यकारी निर्माता प्रेम पुरी हुन्।
Discussion about this post