विशेष अनलाइन । नेपाली चलचित्र ‘लडाइँ पहिचानको’ ले यतिबेला प्रचार–प्रसारलाई अभूतपूर्व गतिमा अगाडि बढाएको छ। दर्शकसमक्ष चलचित्रलाई प्रभावकारी रूपमा प्रस्तुत गर्न निर्माण टिमले प्रचारप्रसारलाई क्षेत्रगत संरचनामा बाँड्दै जिम्मेवारी तोकेको निर्देशक भीम लामाले जानकारी दिएका छन्।
निर्देशक लामाका अनुसार बागमती प्रदेश तथा काठमाडौं उपत्यकाको मिडिया सल्लाहकार तथा प्रमोसन डिजाइनरको जिम्मेवारी रघुनाथ सापकोटालाई दिइएको छ भने बागमती प्रदेशको मिडिया संयोजकको भूमिका हिरोज लोप्चनले निर्वाह गर्नेछन्। त्यस्तै, काठमाडौं उपत्यकाको मिडिया संयोजकको जिम्मेवारी सागर सुब्बालाई तोकिएको छ।
त्यस्तै, कोशी प्रदेशको मिडिया सल्लाहकार तथा प्रमोसन डिजाइनरको जिम्मेवारी सुवास संकल्पलाई दिइएको छ भने कोशी प्रदेशको मिडिया संयोजकको जिम्मेवारी मनोज दाहालले सम्हाल्ने भएका छन्। साथै लुम्बिनी, कर्णाली र सुदूरपश्चिम प्रदेशको मिडिया संयोजकको जिम्मेवारी रामचन्द्र पौडेललाई प्रदान गरिएको छ। निर्देशक लामाका अनुसार आवश्यकताअनुसार अन्य विविध प्रचार–प्रसारका जिम्मेवारीहरू पनि थप रूपमा तोकिँदै जानेछन्।
यसैबीच, चलचित्रको डबिङ कार्य तीव्र गतिमा भइरहेको निर्माण पक्षले जनाएको छ। भीम लामा फिल्मस्को ब्यानरमा बनेको यस चलचित्रमा भारतीय रियालिटी शो इन्डियन आइडल बाट दर्शकमा परिचित भएका अभिनेता प्रशान्त तामाङ र नव–नायिका जेनी तामाङ मुख्य भूमिकामा छन्।
चलचित्रमा लोकप्रिय अभिनेत्री करिश्मा मानन्धर, धिरेन शाक्य, प्रेम सुब्बा, सुरबिर पण्डित, राजेन्द्र खड्गी, किशोर साम्बाहाम्फे, अरुणकुमार प्रधान, शार्मिला राई, पशुराम चौधरी, सुवास योञ्जन तामाङ, दिनेश कोइराला, दिलु सुब्बा, रामजी बिष्ट, नवीन म्यान्याङ्बो, पवि तेम्बे, रोशन शर्मा, छिरिङ शेर्पा, डम्बर कुमारी लिम्बु, अम्बिका ढकाल, सुदीप लिम्बुलगायतका कलाकारहरूको सशक्त अभिनय रहेको छ।
यसमा नृत्य निर्देशन मीनकुमार लिम्बु र सानुराजा लिम्बुले गरेका छन् भने एक्सन निर्देशन देव महर्जनले गरेका छन्। चलचित्रलाई छायांकन मदन घिमिरे कायस्थले गरेका हुन् भने सम्पादनको जिम्मेवारी रमेश विश्वकर्माले सम्हालिरहेका छन्। चलचित्रको नेपालभर प्रदर्शन जिम्मेवारी कुबेर सिने डिस्टुबिटरले लिएको छ ।
निर्देशक लामासहित दिलु सुब्बा, रामजी बिष्ट र उमेश तामाङ चलचित्रका निर्माता रहेका छन्। निर्माण टिमले यो चलचित्रलाई यही आउँदो मङ्सिर ५ गतेदेखि देशभरका सिनेमाघरहरूमा प्रदर्शन गर्ने तयारी गरेको छ।
Discussion about this post