विशेष अनलाइन । स्कटल्याण्डको राजधानी एडिनबरा सहरमा सम्पन्न ‘नेपाल इन्डिजिनियस फिल्म फेस्टिभल २०२५’ मा नेपाली चलचित्र ‘अन्जिला’ ले महत्वपूर्ण सफलता हासिल गरेको छ। अद्भुत अभिनय, सशक्त निर्देशन र जीवन्त प्रस्तुति सहित प्रस्तुत गरिएको उक्त चलचित्रले फेस्टिभलका ३ मुख्य विधामा अवार्ड जित्दै नेपाली चलचित्र क्षेत्रको गौरव बढाएको छ।
चलचित्र ‘अन्जिला’ बाट सिर्जना सुब्बाले उत्कृष्ट चरित्र अभिनेत्रीको उपाधि जितिन् भने माओत्से गुरुङ उत्कृष्ट चरित्र अभिनेता घोषित भए। यस्तै, निर्देशक मिलन चाम्स उत्कृष्ट निर्देशकको रूपमा सम्मानित भए।
उनै निर्देशक चाम्सले निर्देशन गरेको अर्को चलचित्र ‘गोर्खा वारियर’ बाट अभिनेता रितेश चाम्स उत्कृष्ट नव अभिनेता बने ।
‘अन्जिला’ नेपाली महिला फुटबल टोलीकी पूर्व कप्तान अञ्जिला तुम्बापो सुब्बाको जीवनमा आधारित वायोपिक चलचित्र हो। चलचित्रले नेपाल लगायत विश्वका विभिन्न देशहरुमा सफलता पुर्वक प्रदर्शन सम्पन्न गरिसकेको छ भने अझै पनि कतिपय देशहरुमा चलचित्र प्रदर्शन भइरहेको छ । निर्देशक मिलन चाम्सको निर्देशनमा तयार भएको यो चलचित्रमा अञ्जिलाको भूमिकामा उनी स्वयंले अभिनय गरेकी छन्। चलचित्रले एउटा ग्रामीण परिवेशमा हुर्किएकी युवतीले खेलकुद क्षेत्रमा भोग्नुपरेका सामाजिक, सांस्कृतिक, पारिवारिक अवरोध र संघर्षलाई मार्मिक ढंगले प्रस्तुत गरेको छ।
सशक्त अभिनय, जीवन्त संवाद र प्रेरणादायी कथावस्तुले चलचित्रलाई अझ प्रभावशाली बनाएको छ। दर्शक र समीक्षक दुवैले चलचित्रको भावनात्मक गहिराइ र यथार्थपरक चित्रणको प्रशंसा गरेका छन्। नेपाली मौलिकता, पहिचान र आत्मसम्मानको प्रतिनिधित्व गर्ने यो चलचित्रले अन्तर्राष्ट्रिय मञ्चमा नेपाललाई फेरि एक पटक सशक्त रूपमा चिनाउने काम गरेको छ।
हरेक दृश्यमा पसिनाको चमक, आँसुसँग मिसिएको संघर्ष र आत्मविश्वासको उज्यालो झल्काउने ‘अन्जिला’ केवल चलचित्र होइन, एक जीवन्त प्रेरणा हो। स्कटल्याण्डको चिसो मौसममा नेपाली कथाको यो न्यानोपन दर्शकको मुटुमा पुग्न सफल भएको छ।
‘नेपाल इन्डिजिनियस फिल्म फेस्टिभल २०२५’ मा १५ वटा छोटा चलचित्र, ५ वृत्तचित्र, १३ आदिवासी जनजातीय चलचित्र र ८ वटा मुख्यधाराका मौलिक चलचित्रहरू प्रदर्शनमा आएका थिए। यस्तै भिडमा ‘अन्जिला’ को चमक छुट्टै देखिनु यसको कलात्मक गहिराइ र भावनात्मक सम्प्रेषणको प्रमाण हो।
चलचित्रले पाएको सम्मान नेपाली चलचित्रकर्मीहरूका लागि मात्र होइन, सम्पूर्ण देशको गौरव हो। यो यात्राले देखाएको बाटोले अब आउने दिनमा अझ धेरै मौलिक र प्रेरणादायी चलचित्रहरू जन्मिने अपेक्षा गर्न सकिन्छ।
Discussion about this post