अन्तर्राष्ट्रिय प्रतिस्पर्धामा धरानकी इचिङ्साको चमकिलो यात्रा, उत्कृष्ट ९ मा प्रवेश

विशेष अनलाइन । धरानकी युवा नृत्य कलाकार इचिङ्सा लिम्बुले अन्तर्राष्ट्रिय नृत्य प्रतियोगिता मेरो डान्स युनिभर्स मा शानदार प्रदर्शन गर्दै उत्कृष्ट ९ भित्र स्थान बनाएकी छन्। सोमबार सम्पन्न चरणमा प्रभावशाली प्रस्तुति दिएर उनले निर्णायकको प्रशंसा र दर्शकको माया जित्न सफल भइन्।

उनी अघिल्लो चरणदेखि सुरु भएको भोटिङ राउण्डमा निर्णायकको मूल्याङ्कन र जनसमर्थनका आधारमा ५६६ अंक प्राप्त गर्दै अगाडिको यात्रा सुनिश्चित गर्न सफल भएकी हुन्।

झापा, बिर्तामोडबाट अडिसन दिएर प्रतियोगितामा समावेश भएकी इचिङ्साले विभिन्न नृत्यशैलीमा आफ्नो प्रतिभा देखाउँदै निरन्तर प्रगति गर्दै आएकी छन्। उत्कृष्ट १३ बाट सुरु भएको भोटिङ प्रक्रियामा उल्लेखनीय भोट प्राप्त गर्दै उनले उत्कृष्ट ९ सम्मको यात्रा तय गरेकी हुन्।

२५ भन्दा बढी देशका हजारौं प्रतिस्पर्धीहरू सहभागी यस प्रतियोगिता अहिले काठमाडौंमा चलिरहेको छ। प्रतिस्पर्धीहरूको भीडमा आफूलाई छुट्ट्याउँदै इचिङ्साले अन्तर्राष्ट्रिय मञ्चमा नेपाली कला र क्षमतालाई उजागर गरेकी छन्।

प्रतियोगिताको विजेताले १ करोड रुपैयाँ पुरस्कार जित्नेछ भने दोस्रो र तेस्रो हुनेले क्रमशः ७५ लाख र ५० लाख पाउने छन् ।

मेरो डान्स युनिभर्स  प्रतियोगिता इन्ट्रा–नेसनल वेल्फेयर एण्ड सपोर्ट फाउण्डेसन अफ अमेरिकाको आयोजनामा भइरहेको हो। धरानको प्रतिनिधित्व गर्दै अन्तर्राष्ट्रिय रंगमञ्चमा चम्किरहेकी इचिङ्सा लिम्बुलाई थप भोट दिएर साथ दिन चाहानेले ‘My Intra Foundation’ नामक एप डाउनलोड गरेर भोट गर्न सक्छन्। त्यसका साथै, मोबाइल सिमबाट MDU 03 टाइप गरी 37000 मा SMS मा पठाएर पनि भोट गर्न सकिनेछ ।