विशेष अनलाइन । चलचित्र ‘जनै हराएको मान्छे : सम्बन्धका धागाहरू’ को नयाँ गीत ‘मसुरीको दाना’ सार्वजनिक भएको छ। गीतमा चर्चित गायिका अन्जु पन्त र गायक एसडी योगीको स्वर सुन्न पाइन्छ भने शब्द हर्क साउदले लेखेका हुन्। सङ्गीत पनि एसडी योगीकै रहेको छ।
भावनात्मक कथा बोकेको गीतमा प्रेमिल सम्बन्धका संवेदनशील पक्षहरू उजागर गरिएका छन्। प्रेमी–प्रेमिकाबीचको आत्मीयता, इच्छाहरू, र उनीहरूको साझा जीवनप्रतिको सपना गीतका शब्द र संगीतमा झल्किएको छ। ‘दुनियाँ जित्न सक्नेहरू आफ्नै सम्बन्धमा कमजोर देखिन्छन्’ भन्ने यथार्थ गीतको सुरुआतमै उठाइएको छ।
गीतको भिडियोमा अभिनेता विजय बराल, केकी अधिकारी, मिरुना मगर, गौरव पहाडी लगायतका कलाकारहरू फिचर्ड छन्। सुनिल क्षेत्रीको कोरियोग्राफी रहेको गीतलाई थुप्रै कोरस र गम्भीर भावनाले समृद्ध बनाइएको छ।
चलचित्रको निर्देशन हिमाल न्यौपानेले गरेका छन् । चलचित्रको कथावस्तु, पटकथा र संवाद भानुभक्त ढकालले लेखेका हुन्। चलचित्रमा सुशांक मैनाली, भोलाराज सापकोटा, रियर राई, भावना खपांगी मगरलगायतका कलाकारहरूको अभिनय देख्न सकिनेछ।
पेपरक्लिप ब्यानरमा निर्मित यस चलचित्रका निर्माता कमल न्यौपाने र विमल न्यौपाने हुन्। कार्यकारी निर्माताहरूमा नारायण तिमिसिना, चुडामणि शिवाकोटी, आरके मानन्धर, सीआर बस्नेत, फिलिप डिसी र जेम्स महाराजन रहेका छन्। चलचित्रमा भरत रेग्मीको सम्पादन, सुप्रिम पराजुलीको कलर ग्रेडिङ, र चुल्ठे काजीको एक्सन निर्देशन रहेको छ।
Discussion about this post