विशेष अनलाइन । राई समुदायको मौलिक जीवनशैली, संस्कृति र दर्शनलाई पर्दामा कलात्मक ढंगले प्रस्तुत गरिएको चलचित्र ‘नक्छोङ’ स्कटल्याण्डमा सम्पन्न ‘नेपाल इन्डिजिनियस फिल्म फेस्टिभल २०२५’ मा विशेष उल्लेख अवार्ड बाट सम्मानित भएको छ। चलचित्रले प्रदर्शनमा आउनु अगावै अन्तर्राष्ट्रिय अवार्ड हात पार्दै नेपाली मौलिक सिनेमाको स्तरलाई नयाँ उचाइमा पुर्याएको छ।
नेपाल–स्कटल्याण्ड एसोसिएसनले राजधानी एडिन्बरामा आयोजना गरेको सो फिल्म फेस्टिभलमा चलचित्रका तर्फबाट निर्माता ज्योतिराज राई स्वयं उपस्थित थिए। उनले प्राप्त सम्मानलाई आत्मगौरवको विषय मात्र नभई, भविष्यमा अझ सशक्त र सघन सिर्जनाका लागि प्रेरणाको श्रोत भएको बताए। ‘यो अवार्डले थप जिम्मेवारी र हौसला दिएको छ’, निर्माता राईको भावुक प्रतिक्रिया थियो।
चलचित्र ‘नाकछोङ’ लाई निर्देशक किरण राईले निर्देशित गरेका हुन्। चलचित्रले राई समुदायको पुरातन मान्यता, परम्परा, संस्कृति र आत्मादर्शनको सुन्दर प्रस्तुति गरेको छ। परम्परागत संस्कृतिको गन्ध र मौलिकपन बोकेको यो चलचित्र जुलाई २० मा बेलायतको ‘द आसफोर्ड सिनेमा’ मा हाउसफुल प्रदर्शन भएको थियो। विशेष शोको सम्पूर्ण टिकट अग्रिम बुकिङमै बिक्री भइसकेको थियो, जसले चलचित्रप्रतिको चासो र आकर्षण स्पष्ट झल्काउँछ।
फिल्म महोत्सव भव्य रूपमा सम्पन्न भयो, जसमा बेलायतस्थित नेपाली समुदायको उल्लेखनीय सहभागिता रह्यो। प्रमुख अतिथि रूपमा नेपाली राजदूत चन्द्र कुमार घिमिरे तथा विशेष अतिथि रूपमा एडिन्बराका सांसद फेजल चौधरी उपस्थित थिए।
महोत्सवको निर्णायक मण्डलमा नेपालबाट चर्चित निर्देशक दीपेन्द्र लामा, निर्माता तथा कलाकार सगीता श्रेष्ठ, बलिउडका कार्यकारी निर्माता राजेन्द्र घिमिरे, निर्देशक प्रितम गुरुङ, निर्माता ज्योतिराज राई, साथै क्यानडाबाट अभिनेता राजकुमार राई सम्मिलित थिए।
त्यस्तै बेलायतस्थित फिल्मकर्मी मनिष श्रेष्ठ, बिनोद चिपालु, सनम कुमार बैराग, शशी थापा सुब्बा, सिर्जना सुब्बा, म्याराथुन धावक सन्तोष राई लगायत अन्य प्रतिष्ठित व्यक्तिहरूको उपस्थिति महोत्सवलाई अझ गरिमामय बनाएको थियो।
‘नक्छोङ’ चलचित्रले केवल मनोरञ्जन मात्र होइन, नेपाली आदिवासी समाजको ऐतिहासिक चेतना, विश्वास र सांस्कृतिक आत्मालाई अन्तर्राष्ट्रिय दर्शकमाझ पुर्याउने सेतुको काम गरेको छ। यसले नेपाली चलचित्रको मौलिकतालाई विश्वसामु चिनाउने प्रयासलाई अझ सबल बनाएको छ।
Discussion about this post