विशेष अनलाइन । स्कटल्याण्डको राजधानी एडिन्बरामा भव्य रूपमा सम्पन्न भएको Nepal Indigenous Film Festival (NIFF) 2025 मा नेपाली चलचित्र ‘हाँङनान्द’ ले उत्कृष्ट स्क्रिप्ट विधामा अवार्ड प्राप्त गर्दै अन्तर्राष्ट्रिय स्तरमा नेपाली मौलिक कथावस्तुको चमक फैलाएको छ।
नेपाल स्कटल्याण्ड एसोसिएसन, नेपाल चलचित्र निर्देशक समाज, तथा नेपाल चलचित्रकर्मी महासंघ प्रदेश नं. १ को संयुक्त आयोजनामा सम्पन्न महोत्सवलाई आदिवासी जनजाति चलचित्रको इतिहासमा पहिलो ऐतिहासिक उपलब्धिका रूपमा हेरिएको छ।
बिजय सांयोक सुब्बाले निर्देशन गरेको चलचित्र ‘हाँङनान्द’ ले लिम्बू समुदायको मौखिक परम्परा र पौराणिक मिथकलाई अत्यन्त प्रभावशाली शैलीमा प्रस्तुत गरेको छ। चलचित्रमा लिम्बू मुन्धुम अनुसार आफ्नै दाजु केसामी ‘बाघ’ लाई आफ्नै भाइ नामसामी ‘मान्छे’ ले मारेको कथा प्रस्तुत गरिएको छ। मरेको बाघको छालाबाट ‘च्याब्रुङ’ बनाइ बजाउने संस्कार र त्यसमा गुँथिएको गहिरो भावनात्मक प्रसङ्गले दर्शकलाई मनछुने अनुभूति दिन सफल भएको छ।
चलचित्रमा दुई दाजुभाइबीचको घमासान लडाइँ देखाइन्छ। आमाले दुइटै छोराका लागि पृथक फूल अर्पण गर्दै पुकार गरेको मार्मिक दृश्य विशेष प्रभावशाली छ। केसामीका लागि आमाले ‘बाबरी फूल’ र नामसामीका लागि ‘सिल्टेरी फूल’ चढाएकी हुन्छिन्। यसले चलचित्रमा देखाइएको संस्कार, आस्था र आदिम चेतनाको गहिराइलाई प्रष्ट पार्छ।
छैटौँ नेपाल अन्तर्राष्ट्रिय फिल्म महोत्सव २०२३ मा सर्वोत्कृष्ट फिचर फिल्मका रूपमा मनोनीत हुन सफल चलचित्र ‘हाँङनान्द’ ले नेपालमा काठमाडौं, धरान, दमक हुँदै इटहरीसम्म विशेष प्रदर्शनी गरिसकेको छ। त्यस्तै, अन्तर्राष्ट्रिय स्तरमा हङकङका विभिन्न सहरमा चलचित्र प्रदर्शित भइसकेको छ।
चलचित्रका निर्देशक विजय सायोक सुब्बाले केही समयभित्र कोरिया, युके, सिक्किम लगायतका स्थानहरूमा पनि ‘हाँङनान्द’ को विशेष प्रदर्शनीको तयारी भइरहेको जानकारी दिएका छन्।
चलचित्र ‘हाँङनान्द’ को कथा हेमन्तकृष्ण पाइङ्दाक लिम्बुद्वारा लेखिएको हो, जसको निर्माण धनकुमारी लिम्बुले गरेकी हुन्।
चलचित्रमा हेमन्तकृष्ण पाइङ्दाक लिम्बु, सिता तुङ्ग्वाहाङ्फे, चन्द्रध्वज वेगा, नवीन मेन्याङ्वो, उदय सुब्बा, बिनोद पोमो, नुमा लिम्बु, उदय लावती, दिलु सुब्बा, शशी थापा सुब्बा लगायतका कलाकारहरूको दमदार अभिनय रहेको छ।
चलचित्रको छायांकन दीपक बज्राचार्यले गरेका हुन् भने संगीत निर्देशन राजेन्द्र थुलुङ र राजेन्द्र थापाले गरेका हुन्।
चलचित्रको स्क्रिप्ट र प्रस्तुति मात्र नभएर यसको प्रतिनिधित्व पनि उत्तिकै गौरवपूर्ण रह्यो। चलचित्रका कलाकार हिमाल दाहाल स्कटल्याण्डमै उपस्थित भई चलचित्रको प्रतिनिधित्व गर्दै सम्मानित समारोहमा सहभागी भए। त्यस्तै, स्कटल्याण्डस्थित शुभेच्छुकहरू— सुबास थापा, शशी थापा सुब्बा, कमल शर्मा, राम राई, सुनिल राई, राजेन राई लगायत सम्पूर्ण नेपाली समुदायको साथ, समर्थन र हौसलाले यो सफलता अझ सशक्त बन्ने आधार तयार गर्यो।
‘हाँङनान्द’ अब केवल एउटा चलचित्र होइन, यो नेपाली आदिवासी पहिचान, संस्कृति, परम्परा र कथा–वाचनको अन्तर्राष्ट्रिय आवाज बनेर उभिएको छ।
Discussion about this post