विशेष अनलाइन । राजबहादुर सानेको निर्देशनमा बनेको चलचित्र ‘सिटामोल’ को टिजर सार्वजनिक भएको छ। राष्ट्रिय धान दिवस तथा दही–चिउरा खाने दिन पारेर आइतबार सार्वजनिक गरिएको टिजरमा ग्रामीण जीवन, प्रेम, संघर्ष र सामाजिक सम्बन्धको मिश्रण देखाइएको छ।
“जुम्लेलीलाई जीवनजल नै गुन हजुर, रोल्पालीलाई सिटामोल नै सुन हजुर” भन्ने संवादबाट सुरु हुने टिजरले दर्शकलाई पहाडी भूगोल र ती क्षेत्रका जनजीवनमा लैजान्छ। चलचित्रमा सौगात मल्ल र बेनिशा हमालको बाल्यकालदेखिको सम्बन्ध, विवाह, अनि त्यसपछिको जीवनयात्रा केन्द्रमा छ।
आउँदो साउन २३ गतेबाट प्रदर्शनमा आउन लागेको यो चलचित्रमा श्रीकृष्ण निरौला, जानुका विश्वकर्मा, लोकेन्द्र लेखक, भूगोल कार्की, हिउँवाला गौतम, सुशील पोखरेल, दिनेश रेग्मी, आरआर खड्का, ज्ञानु मल्ल, पवन भट्टराई, काजल भुजेल, करण परियार र आराध्या राज्य लक्ष्मी डिसी लगायतका कलाकारहरुको अभिनय रहेको छ।
तुलसीदेवी फिल्मस प्रालिले जुनतारा फिल्म्ससँगको सहकार्यमा निर्माण गरेको ‘सिटामोल’ मा पटकथा प्रदीप भारद्धाज र निर्देशक राजबहादुर सानेकै लेखन रहेको छ। सिमोस सुनुवारको प्रस्तुति रहेको चलचित्रका निर्माता भूगोलकुमार कार्की र विकास राज जोशी हुन्। अप्सरा नेपाली, अजय मल्ल र कुमार केसी कार्यकारी निर्माताको भूमिकामा छन् भने गंगाराम श्रेष्ठ सह-निर्माताका रूपमा जोडिएका छन्।
ग्रामीण परिवेशको कथासँगै नेपाली समाजको मर्म बोकेको चलचित्र ‘सिटामोल’ ले दर्शकको मन जित्ने अपेक्षा गरिएको छ।
Discussion about this post