विशेष अनलाइन । हिमालको काख, परम्पराको मुटु र संस्कृति बोकेको माटोमा पुनः एउटा सशक्त कथा जन्मिएको छ — ‘नाकछोङ’। प्रस्तुतकर्ता ज्योतीराज राईको संरक्षणमा निर्माण भएको यो फिल्मको पहिलो झलक अर्थात् फष्टलुक्स सार्वजनिक भएको छ।
पोस्टरमार्फत सार्वजनिक गरिएको फष्टलुक्समा प्रमुख पात्र भुवन सिंह राईलाई गम्भीर मुद्रामा प्रस्तुत गरिएको छ। उनको पृष्ठभूमिमा काठमाडौंको दृश्य र पूजाको प्रतिनिधित्व गर्ने ‘बिजुवा’ (नाकछोङ) को चित्रणले गहिरो सन्देश बोकेको आभास दिलाउँछ। यो केवल एक दृश्य होइन, यो एक परम्पराको दस्तावेज हो — मौन रुपमा बोलिरहेको, चिच्याइरहेको।
भुवन सिंह राईसँगै फिल्ममा यासेली योङ्हाङ, सागर केरुङ, बबिन राई, शुष्मा सुब्बा गुरुङ, सारा राई, ताया हाङ राई, अनुशा राई, सरोज राई, उत्तम राई, पुर्ण लिम्बु, त्रिचु राई, दिनेश कोइराला, हेम दिलुङ्छा राई, उदय शुब्बा कुरुङ्बाङ, बिनोद पोमो, तुलशा लिम्बु, मदन खोदूङ राई, ससिता राई रसा लिम्बू, मीसन बान्तावा राई र बाल कलाकार जेशन राईको जीवन्त अभिनय समेटिएको छ।
फिल्मको निर्देशन किरण राईले गरेका हुन्। उनले यसअघि ‘लुङा’ र ‘जिउपंचौं’ मार्फत निर्देशनमा आफ्नो पृथक हस्ताक्षर राखिसकेका छन्। यसपटक उनले ‘नाकछोङ’ लाई परम्परा र पहिचानको सेतु बनाएर प्रस्तुत गरेका छन्। लेखन पनि उनकै रहेको यो फिल्मको निर्माता ज्योती राज राई हुन् । छायांकनमा अनुभवी बाबु श्रेष्ठको दृष्टिकोण झल्किन्छ।
फिल्मको गीत-संगीत पक्ष पनि उस्तै सम्वेदनशील र कलात्मक छ। राजन मुकारुङ र बिष्णु किरातिको रचनामा दिनेश काजी वान्तवा, अनिल कोई राईको संगीत सुन्न पाइनेछ भने नोगेन लिम्बु र परेस राईको स्वरले कथालाई आत्मा दिनेछ।
पार्श्वसंगीत मोनिष निरौलाले रचेका छन् भने ध्वनि संयोजन सागर अर्यालको छ। कलरमा अनिल राना, सम्पादनमा निर्देशक स्वयं किरण र निर्माता ज्योतीराज राईको हात छ। फिल्मका कार्यकारी निर्माता रामु श्रेष्ठ हुन् भने निर्माण नियन्त्रक गिरीराज राई र कमल लिम्बु (सार्के) रहेका छन्।
‘नाकछोङ’ केवल एक चलचित्र होइन, यो जातीय चेतना र सांस्कृतिक उत्तराधिकारको चलचित्र हो। निर्माता ज्योतीराज राई भन्छन् — “हाम्रा चाडपर्व, रीतिरिवाज, कुलपितृको पूजा, बिहे, मृत्यु संस्कार जस्ता अवसरमा केन्द्रमा रहने ‘नाकछोङ’ अर्थात् बिजुवाको संरक्षण र पुस्तान्तरण नै यस फिल्मको मूल उद्देश्य हो।”
फिल्मको सार्वजनिक प्रदर्शन मिति अझै तय हुन बाँकी भए तापनि, यसले राष्ट्रिय तथा अन्तर्राष्ट्रिय फिल्म महोत्सवमा सहभागिता जनाएपछि मात्र दर्शकमाझ आउने घोषणा गरिएको छ।
स्मरणीय छ, निर्माता राईले यसअघि ‘लुङ्गा’, ‘संगम’, ‘त्रिवेणी’, ‘पापी मान्छे’, ‘वान वे प्रोड्यूसर’ लगायत चर्चित फिल्महरू र टेलिभिजन सिरिज निर्माण गरिसकेका छन्।
‘नाकछोङ’ले पक्कै पनि नेपाली सिनेमामा मौलिकताको सन्देश बोक्नेछ — जहाँ परम्परा केवल कथा होइन, आत्मा बनिन्छ।
Discussion about this post