विशेष अनलाइन। वेज प्रा.लि.को ब्यानरमा तयार भएको चलचित्र ‘ताराहरू’ को पहिलो पोस्टर सार्वजनिक गरिएको छ। निर्माण पक्षले हालै एक पोस्टर रिलिज गर्दै चलचित्रको भावनात्मक र मनोवैज्ञानिक पाटोलाई दर्शकसामु झल्काउने प्रयास गरेको छ।
पोस्टरमा देखिएका पात्रहरूका अनुहारमा गहिरो सोच, द्वन्द्व र कतै न कतै आशाको झलक छ। यिनै अनुहारमार्फत चलचित्रले दर्शकलाई एक भावनात्मक यात्रामा लैजाने संकेत गर्दछ।
चलचित्रका निर्देशक आशान्त शर्माले ‘ताराहरू’ सहर केन्द्रित निम्नमध्यमवर्गीय जीवनशैलीमा आधारित रहेको जानकारी दिए। निर्देशक शर्माका अनुसार, “उमेरको एक मोडमा आइपुग्दा मानिसले सपनाका पछाडि दौडिन्छ, तर आफ्नै सोच र सीमितताका कारण गलत निर्णयमा पुग्छ। यही मोडमा जब उसलाई साथ दिने मित्रहरू उपस्थित हुन्छन्, उसले जीवनको अर्थ बुझ्न थाल्छ। यही यात्रा फिल्ममा देखाइएको छ।”
चलचित्रमा निर्देशक शर्मा स्वयं पनि अभिनयमा देखिने छन्। साथै, मुख्य कलाकारमा मेनुका प्रधान, कुन्दुन शाक्य, मीरा खड्का, प्रभाकर न्यौपाने, आभास अधिकारी, राज पंगेनी शर्मा, प्रमोद बाबु, र विकास खनाल रहेका छन्।
आगामी भदौ ६ गते बाट देशभर प्रदर्शनमा आउन लागेको चलचित्रका निर्माता गोपिनी सेडाइँ र कृष्णप्रसाद पंगेनी शर्मा हुन्। सह-निर्माताका रूपमा घनलक्ष्मी शाक्य, जगविजय पंगेनी शर्मा र युगविजय पंगेनी शर्माको पनि सक्रिय भूमिका रहेको छ।
जीवनका घुम्ती र भित्री संसारका जटिलतामाथि आधारित चलचित्रले नेपाली चलचित्रमा केही नयाँ अनुभूति दिने अपेक्षा गरिएको छ।
Discussion about this post