विशेष अनलाइन । नेपाली महिला राष्ट्रिय फुटबल टिमकी कप्तान एञ्जिला तुम्बापो सुब्बाको जीवनमा आधारित चलचित्र ‘अञ्जिला’ ले ४औं नेपाल ग्रामीण चलचित्र महोत्सव २०८२ मा ‘सर्वश्रेष्ठ चलचित्र’ र ‘सर्वश्रेष्ठ निर्देशक’ दुवै विधामा पुरस्कार जित्दै ऐतिहासिक सफलता हात पारेको छ।
मिलन चाम्सद्वारा निर्देशित यस चलचित्रले एञ्जिलाको बाल्यकालदेखि राष्ट्रिय टिमको कप्तान बन्ने संघर्षपूर्ण यात्रा चित्रण गरेको छ। एञ्जिला आफैंले मुख्य भूमिका निर्वाह गरेकी छन् भने, दयाहाङ राई, सिर्जना सुब्बा, सुनिल थापा, बुद्धि तामाङ लगायतको अभिनय समेत रहेको छ।
चलचित्रको वर्ल्ड प्रिमियर २०८१ मंसिर २३ गते हङकङमा सम्पन्न भएको थियो। त्यसपछि चलचित्र अस्ट्रेलिया, जापान, दक्षिण कोरिया र बेलायतमा समेत प्रदर्शन भएको छ। बेलायतको एल्डरसटस्थित अम्पायर हलमा आयोजना गरिएको प्रिमियरमा नेपाली राजदूत चन्द्रकुमार घिमिरेले चलचित्रलाई प्रेरणादायी भन्दै प्रशंसा गरेका थिए।
नेपालमा भने यो चलचित्र २०८१ फागुन २९ गते प्रदर्शनमा आएको थियो। सुरुवाती १०५ शोबाट सुरु भएको ‘अञ्जिला’ ले दर्शकको सकारात्मक प्रतिक्रिया पाउँदै दोस्रो सातासम्ममा १७० भन्दा बढी शोमा प्रदर्शन भएको थियो ।
‘अञ्जिला’ नेपाली महिला खेलाडीको संघर्ष र सफलताको कथा मार्फत देश-विदेशमा नेपाली चलचित्रको नाम उजागर गर्दै अगाडि बढिरहेको प्रेरणादायी फिल्म बनेको छ।
Discussion about this post