चलचित्र ‘नाम्लो’को विशेष शोमा नगरप्रमुख हर्क साम्पाङ भावुक

विशेष अनलाइन । सामाजिक सन्देश बोकेको नेपाली चलचित्र ‘नाम्लो’को विशेष प्रदर्शन धरानस्थित फ्रेन्ड्स सिनेमा हलमा सम्पन्न भएको छ। मनोरञ्जनसँगै सामाजिक उद्देश्य बोकेको यस चलचित्रको विशेष शोमा चलचित्रकर्मी, समाजसेवी, पत्रकार तथा विभिन्न क्षेत्रका विशिष्ट व्यक्तित्वहरूको उल्लेखनीय उपस्थिति रहेको थियो।

उक्त विशेष शोमा धरान उपमहानगरपालिकाका नगरप्रमुख हर्क साम्पाङ प्रमुख अतिथिका रूपमा सहभागी भए। चलचित्रको अन्त्यमा प्रयोग गरिएको संवाद “कस्तो दिन आइलाग्यो दैव, आफ्नै मुटुलाई डोकोमा बोकिहिँड्नु पर्ने” ले हर्क साम्पाङलाई भावुक बनायो। उनले खुलेरै चलचित्रको प्रशंसा गर्दै सामाजिक सञ्जालमा समेत लेखे, “चलचित्र ‘नाम्लो’ले रुवायो आज!” उक्त संवादले दर्शकको मुटु छोएको भन्दै नगरप्रमुख साम्पाङले मुक्तकण्ठले प्रशंसा गरे।

पूर्ण लिम्बुको प्रस्तुति रहेको चलचित्र ‘नाम्लो’बाट उठेको सम्पूर्ण रकम नेपालकै विकट क्षेत्रको विकासका लागि खर्च गरिने जनाइएको छ। विशेषगरी सङ्खुवासभा जिल्लाको खाम्लिङ गाउँमा खानेपानी तथा अन्य आधारभूत आवश्यकतालाई पहिलो प्राथमिकताका साथ सम्बोधन गरिने निर्माण टोलिले जनाएको छ।

चलचित्रलाई पूर्ण लिम्बु, लाख बहादुर तामाङ (लाखमान योञ्जन तामाङ) र मदन बहादुर राईले संयुक्तरूपमा निर्माण गरेका हुन्। कथा तथा पटकथा समेत लाख बहादुर तामाङले लेखेका हुन्।

चलचित्रमा पूर्ण लिम्बु, शान्ति पाख्रिन, मदन बहादुर राई, सुवास तामाङ, स्मृति गुरुङ, दिनेश कोइराला, उदय कुरुङ्बाङ, होमनारायण सापकोटा, प्रेम सञ्जय लिम्बु, रमेश कटवाल, रोमन श्रेष्ठ, बिमला राई लगायतका कलाकारहरूको अभिनय देख्न सकिन्छ।

चलचित्रको निर्देशन हेमन तामाङले गरेका हुन् भने छायांकन सुमन तामाङ र सम्पादन तथा कलर ग्रेडिङ पनि हेमन तामाङकै रहेको छ। पोस्ट–प्रोडक्सन कार्य इटहरीस्थित कोशी भिजन फिल्म्स प्रा.लि.मा गरिएको हो।

यसअघि सार्वजनिक गरिएको चलचित्रको गीत ‘सलल बग्ने सभा खोला’ ले दर्शक तथा श्रोतामाझ निकै राम्रो प्रतिक्रिया पाइरहेको छ। उक्त गीतमा नन्दु गुरुङ, सुनिता थेगिम र पूर्ण लिम्बुको स्वर रहेको छ भने प्रेमकृष्ण बजगाईं, पूर्ण लिम्बु र नन्दु गुरुङको शब्द तथा संगीत रहेको छ।