विशेष अनलाइन । नेपाल चलचित्र निर्देशक समाजले आफ्नो २५औं रजत जयन्ती भव्यताका साथ मनाएको छ। समाजले यस अवसरमा नेपाली चलचित्र क्षेत्रमा योगदान पु¥याएका वरिष्ठ तथा विशिष्ट व्यक्तित्वहरूलाई विशेष सम्मानसहित कदर गरेको छ।
काठमाण्डौंको चाबहिलस्थित चलचित्र विकास बोर्डको हलमा आयोजित कार्यक्रममा प्रमुख अतिथिका रूपमा वन तथा वातावरण मन्त्री ऐन बहादुर शाहीको उपस्थिति रहेको थियो भने कार्यक्रमको अध्यक्षता समाजका अध्यक्ष जनकदीप पराजुलीले गरेका थिए।
सो अवसरमा समाजका महासचिव अरुण कुमार प्रधानले समाजको हालसम्मको उपलब्धि र प्रगतिबारे जानकारी गराएका थिए। मन्त्री शाहीले रजत जयन्तीको उपलक्ष्यमा समाजद्वारा प्रकाशित स्मारिकाको विमोचनसमेत गरे।
कार्यक्रममा ‘रजत जयन्ती दीर्घ साधना सम्मान’ वरिष्ठ कलाकार नीर शाह र हीरा सिंह खत्रीलाई प्रदान गरियो भने, वरिष्ठ निर्देशक शम्भु प्रधानलाई विशेष सम्मान प्रदान गरियो।
त्यस्तै, ‘डाइरेक्टर अफ द इयर’को उपाधि फिल्म जारी का निर्देशक उपेन्द्र सुब्बाले प्राप्त गरे। ‘क्रिटिक अवार्ड’ फिडेल देवकोटाले जिते भने ‘रजत जयन्ती स्रष्टा सम्मान’ डा. सुबोध कुमार पोख्रेल, रक्षा सिंह राणा र श्याम राईलाई प्रदान गरिएको थियो।
चलचित्र विकास बोर्डका अध्यक्ष दिनेश डि.सी.ले समाज र बोर्डको नेतृत्वमा पछिल्लो समय थुप्रै रचनात्मक कामहरू भएको उल्लेख गरे।
कार्यक्रममा समाजलाई साथ र सहयोग गर्ने विभिन्न व्यक्तित्व तथा संस्थाहरुलाई पनि सम्मान गरिएको थियो।
नेपाल चलचित्र निर्देशक समाजको यो रजत वर्षको उत्सवले नेपाली चलचित्र क्षेत्रको योगदानलाई कदर गर्नुका साथै भावी पुस्तालाई प्रेरणा दिने विश्वास लिइएको छ।
Discussion about this post