विशेष अनलाइन । चलचित्र ‘कालमाण्डू’ को छायाङ्कन सम्पन्न भएको छ । मुभी ल्यान्ड नेपालको ब्यानरमा निर्माण भएको चलचित्र ‘कालमाण्डू’लाई नेपाली एक्सन–थ्रिलर भनिएको छ । सयनम अधिकारीको डेब्यू निर्देशनमा बनेको चलचित्रको कथा पनि निर्देशक अधिकारीले नै लेखेका हुन् ।
काठमाडौँ, ललितपुर, भक्तपुर साथै पर्साको ठोरी क्षेत्रमा करिब ३५ दिन लगाएर चलचित्र छायाङ्कन गरिएको निर्देशक अधिकारीले विशेष अनलाइनलाई जानकारी दिए । चलचित्र ‘कालमाण्डू’मा मानव तस्करी, हत्या, अपहरण जस्ता अपराधजन्य घटनाहरूलाई कलात्मक शैलीमा उतारिएको निर्देशक अधिकारी बताउँछन् ।
चलचित्रमा गजित बिस्ट, अञ्जन थापा, अनिलराज पौडेल, राजन अधिकारी, अलिशा बास्तोला, रोशनी कार्की, ललना चिमारिया, सुगत करणजित, विशाल पहारी, राकेश कलागाईं, शिव अधिकारी लगायतको अभिनय छ । चलचित्रको छायाङ्कन पवन सुस्लिङ्गले गरेका हुन् भने, द्वन्द्व निर्देशन राजु लामा र मिस्टर काजीले गरेका छन् । रवि भुजेल चलचित्रको सहायक निर्देशक हुन् ।
चलचित्रमा सम्राट न्यौपानेको सङ्गीत तथा सुवास तिमल्सिनाले मेकअप र एसएफएक्सको जिम्मेवारी लिएका छन् । चलचित्रका निर्माता कमल थिङ हुन् । चलचित्रमा शम्भु श्रेष्ठ र मिलन कटवालको प्रोडक्सन व्यवस्थापन रहेको छ । २०८२ सालमा प्रदर्शन गर्ने लक्ष्य राखिएको निर्देशक अधिकारीले बताएका छन् ।
Discussion about this post