विशेष अनलाइन । काठमाडौं ।संजोग राईले निर्देशन गरेको चलचित्र ‘देवी’को ट्रेलर सार्वजनिक भएको छ ।आइतबार आयोजित पत्रकार सम्मेलन गर्दै ट्रेलर सार्वजनिक गरिएको हो। चलचित्रको ट्रेलरमा समाजमा हुने बलात्कारजस्ता जघन्य अपराधका घटनाको कथा प्रस्तुत गरिएको छ ।
राईलाई चलचित्र निर्माणमा मुख्य पात्र शिल्पा मास्केले पनि सघाएकी छन् । उनी यस चलचित्रमा सह-निर्माताको रुपमा छिन् । कथा राम्रो लागेकाले अभिनयसँगै निर्माणमा पनि टिमलाई सघाएको अभिनेत्री मास्केले बताइन् । समाजलाई सचेत बनाउने र सन्देश प्रवाह गर्ने चलचित्रको हिस्सा बन्न पाउँदा खुशी लागेको उनले बताइन् ।
हिन्दू महिलाको मुख्य पर्व हरितालिका तीजको अवसर पारेर (भदौ २१) मा प्रदर्शन हुन लागेको यो चलचित्र नेपालसहित विदेशमा रिलिज हुने जनाइएको छ । चलचित्रमा शिल्पा मास्के ,गौरव पहारी, नाजिर हुसेन, टीका पहारी, प्रभाकर न्यौपाने, ध्रुव कोइराला, निरिक्षा घतानी, विशाल पहारी, निरु खड्का, जीवनजंग खड्का र विकास पन्तलगायत कलाकारहरुको अभिनय रहेको छ ।
क्राइम-थ्रिलर जनरामा निर्माण भएको चलचित्रको कथा निर्देशक राईले अजय गौतमसँग मिलेर लेखेका हुन् । एक्जिबिट स्टुडियोको प्रस्तुतिमा चलचित्र निर्माण भएको हो । रेमन गुरुङ, नारायण राई र सञ्जोग राईको निर्माण रहेको चलचित्रका कार्यकारी निर्माता जावेद खान हुन् । सह-निर्मातामा शिल्पा मास्के, उजेन नोर्वे गुरुङ र मिलन लामा हुन् । चलचित्रलाई मनोज राठी र उज्वल पौडेलले वितरण गर्दैछन् ।
Discussion about this post