विशेष अनलाइन । शङ्कर कोइरालाको निर्देशनमा बनेको चलचित्र ’‘मोदीबेनी’ को ट्रेलर सार्वजनिक गरिएको छ । विहीबार काठमाडौँको नयाँ बानेश्वरमा रहेको आइएनआइ चलचित्र घरमा आयोजित कार्यक्रममा ट्रेलर सार्वजनिक गरिएको हो ।
चलचित्रको ट्रेलरमा एक्सन, प्रेम, कमेडी, वेदना तथा पारिवारिक कथाले विशेष प्रथामिकता पाएको छ । ट्रेलरमा अभिनेत्री रेजिना उप्रेती वर्षाको आमाको भूमिकामा रहेको देख्न सकिन्छ । ट्रेलरमा अभिनेत्री वर्षा शिवाकोटी र नव अभिनेता अमरप्रताप श्रेष्ठबिचको प्रेमसुन्दर ढङ्गले बुनिएको छ । चलचित्रको ट्रेलरमा अभिनेता सरोज खनालको लुक्स पनि ट्रेलरको आकर्षक पक्ष हो ।
श्रावण १८ गतेबाट प्रदर्शनमा आउने चलचित्रमा वर्षा सिवाकोटी, अमर प्रताप श्रेष्ठ, सरोज खनाल, प्रवीण खतिवडा, रेजिना उप्रेती, दिलीप केसी, जीवन भट्टराई, कमलमणि नेपाल, स्नेहा भट्टराई, सुब्रतराज आचार्य, अनामिका लामिछाने, पूजन श्रेष्ठ, गोविन्द सुनार, सरोज अर्याल, लविस गर्तौला, शेरबहादुर बराल, रोजी श्रेष्ठ, हिउवाला गौतम लगायतका कलाकारहरुको अभिनय रहेको छ ।
डिनेस्ट इन्टरटेनमेन्टको प्रस्तुतिमा बनेको यो चलचित्रमा दिलीप केसी निर्माता र हरि श्रेष्ठ सह निर्माता रहेका छन् । चलचित्रलाई आनन्द विक्रम क्षेत्रीले लेखेका हुन् । चलचित्रमा उत्सव दाहालको छायाङ्कन र भरत रेग्मीको सम्पादन छ । एसडी योगी र शान भुसालको सङ्गीतरहेको चलचित्रमा समीर मियाँको भिएफएक्स, सन्तोष लामाको कला निर्देशन, राजु तामाङको द्वन्द्व निर्देशन छ । चलचित्रलाई रिच इन्टरटेन्मेन्टले काठमाडौँ उपत्यका र एफडी कम्पनीले उपत्यका बाहिर वितरण गर्दैछन् ।
Discussion about this post