फ्राइडे रिलिज : आजबाट ‘लाखे’ प्रदर्शनमा, ‘महापुरुष’ दोस्रो सातामा

बिशेष अनलाइन । फ्राइडे रिलिज अन्तर्गत मल्टिस्टारर चलचित्र  ‘लाखे’ आजबाट प्रदर्शनमा आएको छ । यता चलचित्र ‘महापुरुष’दोस्रो सातामा प्रवेश गरेको छ । अघिल्लो साता प्रदर्शनमा आएको चलचित्र ‘महापुरुष’ले आक्रमक व्यापार गरिरहेका बेला चलचित्र  ‘लाखे’ पनि प्रदर्शनमा आएको हो ।

काठमाडौमा भएको प्रिमियरमा सकारात्मक टिप्पणी पाएको ‘लाखे’ अन्ततः चलचित्र  ‘महापुरुष’को छायामा पर्ने निश्चित देखिन्छ । ‘महापुरुष’ निर्माण युनिट कलाकार सहित अहिले पनि देश दौडाहामै छ ।

सम्राट बस्नेत निर्देशित चलचित्र ‘लाखे’एक्सन, सस्पेन्स-थ्रिलर जनरामा निर्माण गरिएको छ । हरि मल्ल ठकुरी चलचित्रका कार्यकारी निर्माता हुन्  ।

चलचित्रमा सौगात मल्ल, अनुप बिक्रम शाही, अर्पण थापा, आर्यन अधिकारी, वर्षा राउत, रोहित रुम्बा, संजोग राणा, सुशील सिटौला, प्रशान्त ताम्राकार, रक्षा बुढाथोकी, कालु राना, सुगन तण्डुकार, बाल कलाकार सिस्टम भण्डारी लगायतका कलाकारको मुख्य भूमिका रहेको छ ।

सिजन अर्यालको कथा तथा निर्माण रहेको चलचित्रलाई डिपी भण्डारी र गणेश मल्ल ठकुरीले संयुक्त निर्माण गरेका हुन्  । चलचित्रमा सुजन प्रजापतिको छायांकन, कविराज गहतराजको कोरियोग्राफी रहेको छ । चलचित्रको सम्पादन अर्जुन जिसीले गरेका हुन् ।