विशेष अनलाइन । आगामी जेठ १५ गतेबाट प्रदर्शनमा आउन लागेको सामाजिक कथावस्तुमा आधारित चलचित्र ‘रोल नं १’ को टिजर युट्युबमार्फत सार्वजनिक गरिएको छ। ग्रामीण परिवेशको पृष्ठभूमिमा निर्माण गरिएको यो चलचित्रले वर्तमान शिक्षा प्रणाली र त्यसले बालबालिकामा पार्ने मानसिक दबाबलाई मुख्य विषयवस्तु बनाएको छ। करिब दुई मिनेट लामो टिजरले चलचित्रको गम्भीर र मर्मस्पर्शी कथाको झलक प्रस्तुत गरेको छ।
टिजरमा विशेषगरी आर्थिक अभावका कारण छात्रवृत्तिको भर पर्नुपर्ने विद्यार्थीको बाध्यता र समाजमा इज्जत जोगाउन अभिभावकले दिने पढाइको दबाबलाई देखाइएको छ। बाबु र छोराको सम्बन्ध, कमजोर स्मरण शक्तिका कारण बच्चाले भोग्नुपर्ने चुनौती र बाबुको मान राख्न छोराले गर्ने मिहिनेतलाई चलचित्रले निकै भावनात्मक रूपमा चित्रण गर्ने संकेत दिएको छ।
कीर्तिमानी चलचित्र ‘पूर्ण बहादुरको सारङ्गी’ का निर्माता विनोद पौडेलको निर्माण रहेको यस चलचित्रलाई जोन योञ्जनले निर्देशन गरेका हुन्। चलचित्रमा मुकुन भुसाल, सुशांक मैनाली, रेणु योगी, सिर्जना अधिकारी, निर्भिक रेग्मी र रिन्चेन लामा लगायतका कलाकारहरूको प्रमुख अभिनय रहेको छ। यसअघि ‘आँखा’ निर्देशन गरेका योञ्जनको यो दोस्रो महत्त्वपूर्ण निर्देशन हो।
महेश दवाडीको लेखन र शिवराम श्रेष्ठको छायांकन रहेको यस चलचित्रमा रोहित शाक्यको पार्श्व संगीत र मदन घिमिरेको सम्पादन रहेको छ। विनोद पौडेल र जाह्नवी पौडेल निर्माता रहेको यस चलचित्रले शिक्षाको नाममा बालबालिकाले भोग्नुपर्ने दबाबको यथार्थलाई पर्दामा उतार्न खोजेको छ।
Discussion about this post